पणजी: पुढील महिन्यात १३ डिसेंबर रोजी होणाऱ्या जिल्हा पंचायत निवडणुकीसाठी आम आदमी पक्षाने १४ उमेदवारांची पहिली यादी सोमवारी जाहीर केली. त्‍यात उत्तर गोव्यातील ६ आणि दक्षिण गोव्यातील ८ मतदारसंघांचा समावेश आहे.

‘आप’चे गोवा प्रमुख अमित पालेकर आणि गोवा प्रभारी आतिषी मार्लेना यांच्या मान्यतेने ही यादी जाहीर करण्यात आली आहे. सर्वांत प्रथम उमेदवार यादी जाहीर करण्यात ‘आप’ आघाडीवर असल्याचे यातून दिसून आले. अजूनही काँग्रेस, भाजप या आघाडीच्या पक्षांकडून उमेदवार जाहीर झालेले नाहीत.

दरम्यान, आमचे उमेदवार हे केवळ स्पर्धक नाहीत, तर त्यांनी खऱ्या अर्थाने लोकांमध्ये जाऊन तळागाळात काम करून हजारो नागरिकांना ‘आप’च्या आरोग्य सुविधांचा लाभ दिला आहे. तसेच ते नागरिकांच्या प्रत्येक संघर्षात त्यांच्यासोबत उभे राहिले आहेत. हे सेवाभिमुख राजकारण प्रत्येक घरात पोहोचविण्यासाठी आमच्या त्यांना शुभेच्छा, असे ‘आप’च्या गोवा प्रभारी आतिषी मार्लेना म्हणाल्या.

भाजपला सडेतोड विरोध देणारे विरोधक म्हणून ‘आप’ने नेहमीच खंबीर भूमिका बजावली आहे. मग ती भ्रष्टाचाराची पोलखोल असो, आरोग्य सुविधांसाठीचा लढा असो किंवा युवक आणि महिलांच्या समस्यांवर उठवलेला आवाज असो. आमचे हे सर्व काम आम्ही लोकांमध्ये घेऊन जाऊ आणि त्यांना ‘आप’ला मतदान करण्याचे आवाहन करू, असे ‘आप’चे प्रदेशाध्यक्ष ॲड. अमित पालेकर यांनी सांगितले.

उमेदवारांची नावे

मोरजी : सुवर्णा हरमलकर, धारगळ : ॲड. प्रसाद शहापूरकर, शिरसई : उमेश कवठणकर, मये- पॅर्पेट मायकल डिमेलो, खोर्ली : पास्कल फर्नांडिस, नगरगाव : अर्जुन गुरव, राय : लुईस ओलिवेरा, वेळ्ळी : इसाका फर्नांडिस, बाणावली : जोसेफ पिमेंता, कोलवा : आंतानियो फर्नांडिस, नावेली : बेट्रिस डिसोझा, सावर्डे : उर्मिला उमेश केरकर, शेल्डे : जेम्स फर्नांडिस, पैंगीण : राजेश गावकर.