पणजी : मान्सूनचा कालावधी औपचारिकरीत्या संपल्यानंतर राज्यातील पावसाचा जोर काहीसा ओसरला होता. मात्र, हवामान विभागाने पुन्हा एकदा पावसाचा इशारा दिला असून गोवा वेधशाळेने बुधवारी (८ ऑक्टोबर) आणि गुरुवारी (९ ऑक्टोबर) राज्यासाठी ‘यलो अलर्ट’ जारी केला आहे.

वेधशाळेच्या माहितीनुसार, बुधवारी प्रामुख्याने उत्तर गोव्यात विजांसह हलका ते मध्यम स्वरूपाचा पाऊस पडण्याची शक्यता आहे. तर गुरुवारी संपूर्ण राज्यात कमी-अधिक प्रमाणात पावसाची नोंद होण्याचा अंदाज व्यक्त करण्यात आला आहे. समुद्रकिनारी वसलेल्या भागात ढगाळ वातावरण आणि अधूनमधून वाऱ्याचा जोर वाढण्याची शक्यता हवामान विभागाने व्यक्त केली आहे.

या पार्श्वभूमीवर किनारपट्टी भागातील मच्छीमारांना खोल समुद्रात न जाण्याचा सल्ला देण्यात आला आहे. पर्यटकांनीदेखील समुद्रकिनाऱ्यावरील क्रियांमध्ये काळजी घ्यावी, असे आवाहन प्रशासनाकडून करण्यात आले आहे.

गेल्या काही दिवसांपासून राज्यात उष्णतेची लाट जाणवत असतानाच या पावसामुळे तापमानात थोडीशी घट होण्याची शक्यता आहे. मात्र, अचानक पावसामुळे काही ठिकाणी वाहतूक विस्कळीत होऊ शकते, तसेच ओलसर हवामानामुळे आरोग्यविषयक तक्रारी वाढण्याचीही शक्यता तज्ज्ञांनी वर्तविली आहे.

दरम्यान, हवामानातील या चढउतारांमागे बंगालच्या उपसागरात निर्माण झालेल्या कमी दाबाच्या पट्ट्याचा प्रभाव असल्याचे सांगण्यात येत आहे. त्यामुळे पुढील काही दिवस राज्यात आंतरमिटीत पावसाचे प्रमाण कायम राहू शकते, असा अंदाज वेधशाळेने वर्तवला आहे.