पणजी: काही दिवसांपूर्वी गोव्यातील पर्यटनाच्या आकड्यांमध्ये घट झाली असल्याची माहिती समोर आली होती, मात्र सुरुवातीला कमी वाटणारा पर्यटकांचा गोव्याकडील ओढा आता वाढला आहे. सध्या राज्यात कार्निवल आणि शिगमोत्सवाची तयारी सुरु आहे आणि या पार्श्वभूमीवर पर्यटकांच्या संख्येत वाढ होण्याची शक्यता आहे. याशिवाय हिंटरलँड देखील विदेशी पर्यटकांना गोव्याकडे आकर्षित करत आहे.

अमेरिकेतील आंतरराष्ट्रीय बुकिंग पोर्टल एक्सपेडियाने जारी केलेल्या एका अहवालानुसार वर्ष २०२४ मध्ये गोव्याच्या पर्यटकांमध्ये घट झाली होती मात्र आता इंटरनेशनल डेस्टीनेशन्समध्ये गोव्याने आपले स्थान बळकट केले आहे. एक्सपेडियाच्या अहवालानुसार गोवा जानेवारी २०२५ पासून बराच चर्चेत आला आहे. गोव्यासाठी फ्लाइट बुकिंग करणाऱ्यांची संख्या गेल्या दोन वर्षांच्या तुलनेत तब्बल आता १५५ टाक्यांनी वाढली आहे.

गोवा आंतराष्ट्रीय स्थरावर पर्यटनाची चांगली जाहिरात करतोय, आणि परिणामी गोवा परदेशी पर्यटकांमध्ये अधिक प्रसिद्ध होतोय. ट्रॅव्हल अँड टुरिझम असोसिएशन ऑफ गोवाचे अध्यक्ष जॅक सुखिजा यांनी दिलेल्या माहितीनुसार टुरिझम ब्रँडमुळे गोव्यात येणाऱ्या आंतराष्ट्रीय विमान बुकिंगच्या संख्येत वाढ झाली आहे.

आम्ही गोव्यात येणाऱ्या पर्यटकांच्या कोन्टिटीवर नाही तर कॅलिटीवर लक्ष देतोय. गोव्याच्या पर्यटन क्षेत्रात पायाभूत सुविधा मजबूत करण्यावर लक्ष केंद्रित करतोय आणि गोव्याच्या पर्यटन क्षेत्राबद्दल जागृती करण्याचा प्रयत्न करतोय असं पर्यटन मंत्री रोहन खवंटे म्हणाले आहेत.

काही दिवसांपूर्वी गोव्यातील पर्यटनावर अनेक प्रश्न उपस्थित केले जात होते. सोशल मीडियावर गोव्याच्या पर्यटनाची बदनामी करणारे व्हिडीओ फिरत होते. काही पर्यटकांना मारहाण तसेच खुनाच्या बातम्या समोर येत होत्या मात्र आता समोर आलेल्या अहवालामुळे गोव्याच्या पर्यटनाचे चित्र सुधारत आहे.