Sanguem Car Accident सांगेत काल सोमवारी रात्री नदीत कार कोसळून झालेल्‍या अपघातात माय-लेकाचा मृतदेह सापडला होता. आज मंगळवारी सकाळी सुमारे 10.05 वाजता दोन तासांच्या अथक प्रयत्नानंतर मिलिंद नाईक (वय 38) यांचाही मृतदेह संगमेश्वर नदीतून बाहेर काढण्यात आला.

या हृदयद्रावक घटनेत आईवडिलांसह दोन वर्षांच्‍या चिमुकल्‍या बालकाला जीव गमवावा लागल्‍याबद्दल हळहळ व्‍यक्त करण्‍यात येत आहे.

सोमवारी रात्री आठच्‍या सुमारास तारीपांटो पुलावर हा अपघात घडला होता. कार नदीत कोसळल्‍याचा आवाज झाल्‍यानंतर लोकांनी घटनास्‍थळी धाव घेतली. तसेच अग्निशमन दलाला कल्‍पना दिली.

दलाच्‍या जवानांनी घटनास्‍थळी धाव घेऊन दीड-दोन तासांच्‍या प्रयत्‍नानंतर नदीत पडलेल्‍या कारसह रेखा जाधव (३२) व दिव्‍यांश नाईक (२) यांचे मृतदेह पाण्‍यातून बाहेर काढले होते, पण गाडी चालवणारे मिलिंद नाईक यांचा थांगपत्ता लागू शकला नव्‍हता. आज सकाळी त्‍यांचाही मृतदेह सापडला.

स्थानिकांनी सांगितले की, तारीपांटो येथील या पुलावर जर संरक्षण कठडा असता, तर कदाचित हा अपघात घडला नसता. समाजकल्याणमंत्री सुभाष फळदेसाई यांनी सांगितले की, अपघात हा अपघात असतो. आम्ही त्या पुलावर आता क्रॅश बॅरिअर्स बसवणार आहोत.

तसेच सार्वजनिक बांधकाम विभागाच्या अधिकाऱ्यांना सांगून अपघात टाळता यावेत यासाठी सावधगिरीची पावले उचलण्यात येतील.

मुलीचा आक्रोश

मिलिंद नाईक यांचा मृतदेह इस्पितळात पाठविण्‍यासाठी जेव्हा शववाहिकेत घालण्यात आला, तेव्हा जवळच रस्त्याच्या कडेला उभी असलेली त्यांची 15 वर्षांची मुलगी ओक्‍साबोक्‍सी रडू लागली. काल तिनेच आपल्‍या आई व भावाच्या मृतदेहाची ओळख पटविली होती. ही मुलगी अनाथ झाली आहे. त्‍या मुलीची स्‍थिती पाहून तेथे उपस्‍थित लोकही हळहळले.