Professional League Football Tournament ज्योएल बार्रेटो याने नोंदविलेल्या शानदार गोलच्या बळावर गार्डियन एंजल स्पोर्टस क्लबने गोवा प्रोफेशनल लीग फुटबॉल स्पर्धेत बुधवारी सलग दुसऱ्या विजयाची नोंद केली. त्यांनी सेझा फुटबॉल अकादमीस 1-0 फरकाने हरविले. सामना म्हापसा येथील धुळेर स्टेडियमवर झाला.

सामन्यातील निर्णायक गोल सामनावीर पुरस्काराचा मानकरी ठरलेल्या ज्योएल याने 77 व्या मिनिटास नोंदविला. गार्डियन एंजल क्लबने मागील लढतीत वास्को क्लबला पराभूत केले होते.

लागोपाठ दोन सामने जिंकल्यामुळे त्यांचे आता सहा गुण झाले आहेत. पराभवामुळे दोन लढतीनंतर सेझा अकादमीचे तीन गुण कायम राहिले. अगोदरच्या फेरीत त्यांनी यंग बॉईज टोंक संघाला चार गोलने सहज हरविले होते. स्पर्धेत गुरुवारी (ता. ७) वास्को स्पोर्टस क्लब व पॅक्स ऑफ नागोवा यांच्यात धुळेर स्टेडियमवर सामना होईल.