डिचोली: सत्ताधारी भाजपने ‘गोवा फॉरवर्ड''चा धसका घेतला असून, मये मतदारसंघातील कार्यकर्त्यांना धमकावण्याचे प्रकार घडत आहेत, असा आरोप गोवा फॉरवर्डचे कार्यकर्ते प्रा. राजेश कळंगुटकर यांनी केला आहे. जिल्हा पंचायत निवडणुकीतून मये मतदारसंघात निश्चितच राजकीय बदल दिसून येईल, असा विश्वासही त्यांनी व्यक्त केला.

जिल्हा पंचायतीच्या मये मतदारसंघातील काँग्रेस-गोवा फॉरवर्ड युतीच्या उमेदवार प्रा. राधिका कळंगुटकर यांनी सोमवारी उमेदवारी अर्ज भरला. त्यानंतर पत्रकारांशी संवाद साधताना प्रा. राजेश कळंगुटकर यांनी बोलताना भाजपच्या मयेतील २५ वर्षांच्या राजवटीला कंटाळली आहे. असे सांगून यावेळी बदल घडवून आणण्यासाठी मतदार सज्ज असल्याचे सांगितले.

भाजपला सर्वसामान्य जनतेचे काहीच पडलेले नाही. असेही ते म्हणाले. यावेळी गोवा फॉरवर्डच्या उमेदवार प्रा. राधिका कळंगुटकर, गोवा फॉरवर्डचे सरचिटणीस दुर्गादास कामत, संतोषकुमार सावंत, मये गट अध्यक्ष वीरेंद्र पत्रे आदी कार्यकर्ते उपस्थित होते.

प्रा. राधिका कळंगुटकर या युतीच्या उमेदवार असून, कार्यकर्त्यांची धडपड पाहता त्यांना विजयाची अधिक संधी आहे, असा विश्वास दुर्गादास कामत यांनी व्यक्त केला. निवडून आल्यानंतर मतदारांच्या अपेक्षा पूर्तीसाठी मी कार्यरत राहणार, अशी ग्वाही प्रा. राधिका कळंगुटकर यांनी दिली.