पणजी: गोव्यात कायदा आणि सुव्यवस्थेचा पूर्णपणे ऱ्हास झाल्याबद्दल 'आप'चे राष्ट्रीय संयोजक अरविंद केजरीवाल यांनी भाजप सरकारवर जोरदार टीका केली आहे. गोव्यात खून, गोळीबार आणि दिवसाढवळ्या दरोड्याच्या घटना वाढल्याचे सांगत केजरीवाल यांनी भाजपशासित गोव्याला 'कायदाहीन राज्य' असे संबोधले. केजरीवाल यांच्या या तीव्र टीकेला भाजपने लगेचच 'ये अज्ञानी' असे संबोधत ट्विटरद्वारे (X) जोरदार प्रत्युत्तर दिले आहे.

केजरीवाल यांची भाजप सरकारवर थेट टीका

अरविंद केजरीवाल यांनी सोशल मीडियावर पोस्ट करत गोव्यातील परिस्थितीवर तीव्र नाराजी व्यक्त केली. त्यांनी गेल्या काही दिवसांतील गंभीर घटनांचा उल्लेख केला, ज्यामुळे राज्यातील कायदा आणि सुव्यवस्थेवर प्रश्नचिन्ह उभे राहिले आहे. डोंगर तोडण्यास विरोध करणाऱ्या एका गोमंतकीय व्यक्तीची हत्या, बेकायदेशीर वाळू उपसा करणाऱ्यांवर कारवाई करताना नागरिकांवर गोळ्या झाडल्या जाणे, पोलीस ठाण्यातच एका तरुणाला मारहाण आणि साळगावमध्ये लोक रक्ताच्या थारोळ्यात मारले गेले अशा विविध घटना त्यांनी अधोरेखित केल्या.

केजरीवाल यांनी आपल्या पोस्टमध्ये म्हटले, "खून, गोळीबार, दिवसाढवळ्या दरोडा. गोव्यात काय चालले आहे? भाजपच्या नेतृत्वाखाली गोव्यात कायदा आणि सुव्यवस्थेचा हा पूर्णपणे ऱ्हास आहे. भाजपने गोव्याला कायदाहीन राज्यात बदलले आहे." या विधानाद्वारे त्यांनी भाजप सरकारवर थेट निशाणा साधला.

भाजपकडून 'ये अज्ञानी' म्हणत पलटवार

केजरीवाल यांच्या आरोपांवर भाजपने त्याच ताकदीने ट्विटरद्वारे (X) उत्तर दिले. भाजपने केजरीवाल यांना गोव्याबद्दल 'तथ्य जाणून घेतल्याशिवाय बोलणे थांबवावे' असा सज्जड दम भरला. भाजपने थेट केजरीवाल यांच्या प्रशासकीय कार्यक्षमतेवर प्रश्नचिन्ह उभे करत त्यांचा गोव्यातील कायदा आणि सुव्यवस्थेचा ऱ्हास झाल्याचा आरोप फेटाळला.

भाजपने म्हटले, "तथ्य जाणून घेतल्याशिवाय आमच्या राज्याबद्दल बोलणे थांबवावे. तुम्ही सत्तेत असताना दिल्लीचा नाश केला. आता तुम्ही पंजाबचा नाश करण्याचा प्रयत्न करत आहात." अशा प्रकारे भाजपने गोव्यातील कायदा आणि सुव्यवस्थेचा ऱ्हास झाल्याचा 'आप'चा आरोप फेटाळला, तसेच केजरीवाल यांच्या प्रशासनावर थेट टीका केली.