Goa Assembly Monsoon Session गोव्याच्या आरोग्य विभागाने २०१९ पासून यावर्षी ३० जूनपर्यंत राज्यात दारूच्या व्यसनाची १,८७५ आणि अमली पदार्थ सेवनाची २८५ प्रकरणे नोंदवली आहेत. यातून केवळ ८४४ मद्यसेवन आणि १२१ अमली पदार्थ सेवन प्रकरणे उपचारासाठी दाखल झाली आहेत.

गुरुवारी (ता.५) फातोर्डाचे आमदार विजय सरदेसाई यांनी आरोग्यमंत्री विश्वजीत राणे यांना २०१९ पासून आजपर्यंत गोव्यातील ड्रग्स आणि दारू व्यसनाधीनांच्या स्थितीबाबत अतारांकित प्रश्न विचारला.

या प्रश्नाला उत्तर देताना राणे यांनी आपल्या उत्तरात सांगितले की, २०१९ पासून ३० जून २०२३ पर्यंत एकूण १८७५ मद्यसेवन प्रकरणे आणि २८५ अमली पदार्थ सेवनाची प्रकरणे आरोग्य विभागाकडे नोंदवण्यात आली आहेत. यापैकी केवळ ८४४ मद्य सेवन आणि १२१ ड्रग्स सेवन प्रकरणे वैद्यकीय उपचारासाठी दाखल करण्यात आली.

सरदेसाई यांच्या त्यानंतरच्या प्रश्नाला उत्तर देताना आरोग्यमंत्र्यांनी खुलासा केला की, आयपीएचबीमधील नवीन २०० खाटांच्या हॉस्पिटलच्या दुसऱ्या टप्प्यात ३३ खाटांचा व्यसनमुक्तीसाठी वॉर्ड सुरू करण्याची विभागाची योजना आहे.

मानसोपचार आणि मानवी वर्तन संस्था (आयपीएचबी) दारू आणि ड्रग्सच्या व्यसनाच्या समस्येने ग्रस्त लोकांना समुपदेशन आणि उपचार प्रदान करते.

५,८६३ व्यसनाधीन व्यक्ती आहेत ज्यांना आरोग्य विभागाकडून उपचार आणि समुपदेशन करता आले. जानेवारी २०१९ पासून ५,६०९ व्यसनाधीन आहेत ज्यांचे पुनर्वसन, उपचार, डिटॉक्सिफिकेशन चालू आहे. - विश्‍वजीत राणे, आरोग्यमंत्री