फोंडा: गोवा डेअरी नफ्यात येत असून गेल्या आर्थिक वर्षात १ कोटी २७ लाख रुपये नफा झाल्याची माहिती गोवा डेअरीच्या रविवारी सहकार भवनात झालेल्या आमसभेत देण्यात आली.

गोवा डेअरीच्या प्रशासकीय समितीचे अध्यक्ष पराग नगर्सेकर यांच्या अध्यक्षतेखाली झालेल्या या सभेला रामा परब, व्यंकटेश शेणवी तसेच व्यवस्थापकीय संचालक नवीन कुमार यांच्यासह राज्यातील दूध उत्पादक संस्थेचे प्रतिनिधी उपस्थित होते.

मागील काळात गोवा डेअरी आणि पशुखाद्य प्रकल्पातील सुमारे साडेतीन कोटी रुपयांची आर्थिक तूट भरून काढण्यात आली असल्याचीही माहिती दूध उत्पादकांना देण्यात आली.

गोवा डेअरीचे दूध संकलन कमी झाले असून खपही कमी झाल्यासंबंधी सभेत चर्चा करण्यात आली.

आधारभूत किमतीत वाढ करून दिल्यास नवीन दूध उत्पादक या व्यवसायात येऊ शकतात असेही दूध उत्पादकांनी सांगून नवीन दूध उत्पादकांना प्रोत्साहन देण्यासाठी नवनवीन योजना राबवण्याची गरज दूध उत्पादकांनी व्यक्त केली.

आधारभूत किमतीवरच दूध उत्पादकांचा खर्च चालत असून सध्या असलेली आधारभूत किंमत वाढीसाठी कार्यवाही झाल्यास दूध उत्पादकांना हायसे वाटेल, असे मत दूध उत्पादकांनी व्यक्त केले. संध्या ४० टक्के अनुदान दिले जाते ते १०० टक्के करण्याची मागणी दूध उत्पादकांनी केली.

दूध उत्पादन वाढीसाठी कामधेनू योजना सुधारित रूपात लागू करण्याची गरजही यावेळी दूध उत्पादकांनी व्यक्त केली. यावेळी दूध उत्पादक संस्थांचे अध्यक्ष दुर्गेश शिरोडकर, विकास प्रभू व इतरांनी चर्चेत भाग घेतला.

अपात्र संचालकांवरून सभेत गोंधळ

सहकार खात्याने अपात्र ठरवलेले काही संचालक आमसभेत आल्याने काही प्रतिनिधींनी त्याला आक्षेप घेतला. त्यावर आम्हाला सहकार खात्याने अपात्र केले असले तरी आम्ही दूध संस्थांचे अध्यक्ष असून गोवा राज्य सहकारी बँकेच्या निवडणुकीत आम्हाला मतदान करण्यास मुभा दिली होती त्याची आठवण यावेळी करून देण्यात आली. शेवटी त्यांना आमसभेला उपस्थित राहण्याची परवानगी देण्यात आली तर काही संचालकांनी सभात्याग केला.