मडगाव: दक्षिण गोव्‍यात अल्‍पवयीन मुलांचे अपहरण होण्‍याची प्रकरणे वाढली असून मागच्‍या सात दिवसांत कोलवा, कुंकळ्‍ळी, केपे व मडगाव अशा चार ठिकाणी अल्‍पवयीनांच्‍या अपहरणांची प्रकरणे नोंद झाली आहेत. त्‍यापैकी एकाच प्रकरणाचा छडा पोलिस लावू शकले तर तीन प्रकरणांचा तपास अजूनही प्रलंबित आहे.

११ नोव्‍हेंबर राेजी कुंकळ्‍ळी पोेलिसांतही अशीच तक्रार नोंद करण्‍यात आली होती. ओडिसा येथील एका व्यक्तीने आपल्‍या अल्‍पवयीन मुलाचे तलवाडा-कुंकळ्‍ळी येथून अपहरण केल्‍याची तक्रार नोंद केली होती. याही प्रकरणात गुन्‍हा नोंद केला असून कुंकळ्‍ळीचे उपनिरीक्षक साहिल पागी हे तपास करीत आहेत.

केपे पोलिस स्‍थानकातही १५ नोव्‍हेंबर रोजी अशी अपहरणाची केस नोंद झाली हाेती. एका अल्‍पवयीन मुलीच्‍या आईने रात्री ८.३० वा.च्‍या दरम्‍यान कुणीतरी आपल्‍या मुलीचे अपहरण केल्‍याची तक्रार दिली होती. या प्रकरणात सध्‍या उपनिरीक्षक याेगेश गावकर हे तपास करीत आहेत.

१६ नोव्‍हेंबर राेजी अशाचप्रकारचे एक प्रकरण मडगाव पोलिसांत नोंद झाले असून खारेबांद येथे राहणाऱ्या एका व्यक्तीने आपल्‍या अल्‍पवयीन मुलीचे कुणीतरी अपहरण केल्‍याची तक्रार दिली होती. या प्रकरणात पोलिसांनी गुन्‍हा नोंद केला असून तपास सुरू आहे.

अल्‍पवयीन मुलांचे अपहरण होण्याच्या वाढत्या प्रकरणांमुळे पालक चिंतेत आहेत. या प्रकरणांचा वेळीच तपास लावणे हे पोलिसांसमोरील मोठे आव्हान असले तरी पोलिस यंत्रणा याबाबत गंभीर असल्याचे अधिकाऱ्यांनी सांगितले.

कोलव्यातही तक्रार

अशाच प्रकारची एक तक्रार कोलवा पोलिस स्‍थानकात नाेंद झाली होती. माजोर्डा परिसरातून तीन अल्‍पवयीन मुलगे नाहीसे झाले होते. या प्रकरणात अपहरणाची केस नोंद झाली होती. मात्र, नंतर हे तिघेहीजण केरळमध्‍ये सापडले होते.