वाळपई: चोर्ला घाट येथे बुधवारी पहाटे भीषण अपघातात प्लायवूडने भरलेली आंध्रप्रदेश नोंदणीची लॉरी खोल दरीत कोसळून चालकाचा मृत्यू झाला, तर क्लिनर गंभीर जखमी झाला. ही घटना पहाटे ४ दरम्यान वाइल्डेस्ट रिसॉर्टजवळ घडली. घाटातील उतरणीवर वाहनावरील ताबा सुटल्याने अपघात झाला.

लॉरी पूर्णपणे प्लायवूडने भरलेली असल्याने केबिन चेंगराचेंगरीत होऊन दोघेही आत अडकले. सकाळी नागरिकांच्या निदर्शनास अपघात आल्यानंतर पोलिस व बचाव पथके घटनास्थळी दाखल झाली. गोवा वैद्यकीय महाविद्यालय येथे जखमीला उपचारासाठी हलविण्यात आले.

सुमारे ३० जणांच्या पथकाने जेसीबीच्या साहाय्याने ढिगारा हटवत तब्बल १२ तासांच्या प्रयत्नांनंतर मृतदेह बाहेर काढला. दरीतील अवघड भौगोलिक परिस्थितीमुळे बचावकार्य अत्यंत जोखमीचे ठरले. स्थानिक नागरिकांनीही मदतीसाठी पुढाकार घेतला.

या प्रकरणाचा पुढील तपास वाळपई पोलिस निरीक्षक विदेश शिरोडकर यांच्या मार्गदर्शनाखाली उपनिरीक्षक सोहम मळीक करीत आहेत. रात्री उशिरापर्यंत दोन्ही व्यक्तींची संपूर्ण ओळख पटलेली नव्हती.

‘अग्निशमन’चे बचावकार्य

या बचावकार्यात वाळपई, डिचोली, फोंडा व पणजी येथील अग्निशमन दलाच्या जवानांना पाचारण केले होते. सत्तरीचे मामलेदार धीरेन बाणावलीकर, संयुक्त मामलेदार विष्णू राणे, वाहतूक पोलिस निरीक्षक चंद्रकांत गावस आदीनी घटनास्थळी भेट देऊन मदतकार्याचे समन्वयन केले.