Vinod Tawde न्याय्य मागण्यांसाठी आंदोलन हे केलेच पाहिजे, मग ते सरकार भाजपचे असले तरीदेखील डगमगू नका. आंदोलन हे युवकांना आकर्षित करण्याचे एक प्रभावी अस्त्र असून त्याला गंज चढू देऊ नका, असा सडेतोड सल्ला भाजपचे केंद्रीय सरचिटणीस विनोद तावडे यांनी ‘अभाविप’च्या कार्यकर्त्यांना दिला.

इन्स्टिट्यूट मिनेझिस ब्रागांझा संस्थेच्या सभागृहात आयोजित अखिल भारतीय विद्यार्थी परिषदेच्या अमृतमहोत्सवी कार्यक्रमात ते बोलत होते. यावेळी व्यासपीठावर ‘अभाविप’च्या राष्ट्रीय मंत्री अंकिता पवार, गोवा प्रमुख विलास सतरकर, गोवा संयोजक धनश्री मांद्रेकर तसेच इतर पदाधिकारी उपस्थित होते. यावेळी तावडे म्हणाले, आमचे विरोधक समाज माध्यमांद्वारे भारतीयत्वाच्या विरोधात प्रचार करत आहेत.

‘मुख्यमंत्र्यांना माझे नाव सांगा’

विद्यार्थ्यांच्या विरोधात काम करणाऱ्यांविरुद्ध आंदोलन केलेच पाहिजे, अगदी सरकार भाजपचे असले तरीही. मुख्यमंत्री प्रमोद सावंत, श्रीपाद नाईक यांनी विरोध केल्यास त्यांना माझे नाव सांगा. कारण अभाविपने विद्यार्थ्यांच्या प्रश्नाविरुद्ध आंदोलन केले नाही, तर इतर विद्यार्थी संघटना आंदोलन करतील, असे विनोद तावडे यावेळी म्हणाले.

पूर्वी ताजमहाल, आता भगवद् गीता

2014 पूर्वी पंतप्रधानांना जे विदेशी पाहुणे भेटायचे, त्यांना भेट म्हणून जगातील सात आश्चर्यांपैकी एक असलेल्या ताजमहालची प्रतिकृती देण्यात येत असे;

परंतु पंतप्रधान नरेंद्र मोदी हे विदेशी पाहुण्यांना संस्कृत किंवा इंग्रजी भाषेमधील श्रीमद् भगवद् गीतेची प्रत देतात. देशपातळीवरच नव्हे, तर जागतिक पातळीवरही आपल्या विचारांचा प्रभाव वाढल्याचे तावडे म्हणाले.