Goa Waterfalls : हरवळे-साखळी येथील श्री रुद्रेश्वर मंदिरासमोर कोसळणाऱ्या भीमतीर्थ धबधब्याने रौद्ररूप धारण केले आहे. हे रौद्ररूप न्याहाळून त्यातून उडणारे तुषार अंगावर उडवून घेण्यासाठी आज रविवारी सकाळपासून संध्याकाळपर्यंत देशी पर्यटकांसह स्थानिकांनीही मोठी गर्दी केली होती. या धबधब्यासह हरवळेत असलेल्या पांडवकालीन गुंफांनाही पर्यटक भेट देत आहेत.

सतत पंधरा दिवस कोसळणाऱ्या पावसामुळे हरवळेतील या धबधब्याला गेल्या शुक्रवारीच उधाण आले होते. शनिवारी तर हा धबधबा सर्व सीमा ओलांडून खाली कोसळत होता. त्यातून निर्माण होणारे तुषार या भागात येणाऱ्यांना परिसरात उभेही राहण्याची संधी देत नव्हते. रविवारी या धबधब्यावर मोठ्या संख्येने पर्यटकांची गर्दी होण्याची शक्यता होती. त्याप्रमाणे आज सकाळपासूनच धबधब्यावर देशी तसेच विदेशी पर्यटकांनीही गर्दी केली होती. सेल्फी घेण्याचा मोहसुद्धा अनेकांना आवरला नाही.

भीमतीर्थ धबधब्‍याचा आनंद घेताना प्रत्येकाने स्वतःची काळजी घ्यावी. पाण्याच्या खोलीचा अंदाज नसलेल्यांनी पाण्यात उतरू नये. धबधब्याच्या परिसरात कचरा न करता तो कचराकुंड्यांमध्ये टाकावा. या स्थानाचे पावित्र्य राखा.

संगेश कुंडईकर, हरवळे देवस्थान समितीचे ॲटर्नी