Shirgao Lairai Devi Jatra Stampede

डिचोली: राज्यातील प्रसिद्ध शिरगावच्या देवी लईराईच्या जत्रोत्सवात चेंगरा चेंगरी होऊन सात भाविकांचा मृत्यू झाल्याची धक्कादायक घटना समोर आली आहे. तसेच, 40 पेक्षा जास्त भाविक जखमी झाले आहेत. रात्रीच्या सुमारास ही घटना घडली. जखमी भाविका्ंना डिचोली आरोग्य केंद्र, म्हापसा जिल्हा रुग्णालय आणि गोमेकॉत उपचारासाठी दाखल करण्यात आले आहे.

मिळालेल्या माहितीनुसार, लईराईच्या यात्रेत रात्रीच्या सुमारास चेंगरा चेंगरी झाली यात सात भाविकांचा मृत्यू झाला आहे. मृतांमध्ये दोन महिला आणि एक सतरा वर्षीय युवकासह इतरांचा समावेश आहे. तर, चाळीस पेक्षा अधिकजण जखमी झाले आहेत.

यात धोंडांचा देखील समावेश आहे. २० जणांची प्रकृती चिंताजनक असल्याचे समजत आहे. मृतांचा आकडा वाढण्याची भीती व्यक्त केली जात आहे. घटनास्थळी सध्या बचाव कार्य सुरु असून, जखमींना रुग्णालयात दाखल केले जात आहे.

शिरगाव येथील प्रसिद्ध देवी लईराईच्या जत्रोत्सवाला शुक्रवार (०२ मे) पासून सुरुवात झाली. गोव्यासह शेजारील महाराष्ट्र आणि कर्नाटकातील भाविकांचे श्रद्धास्थान असलेल्या या जत्रेला मोठ्या प्रमाणावर भाविक गर्दी करत असतात. दरम्यान, यात्रेच्या पहिल्याच दिवशी या उत्सवाला गालबोट लागले आहे.

काही भाविकांना उपचारासाठी अझिलो रुग्णालयात दाखल करण्यात आले आहे. आमदार चंद्रकांत शेट्ये, पेमेंद्र शेट आणि जिल्हाधिकारी स्नेहा गिते हे सध्या रुग्णालयात असून, जखमींची विचारपूस करत आहेत.