वाळपई : प्राथमिक अवस्थेत मुलांची जडण घडण होण्यासाठी पंचकोशात्मक विकास झाला पाहिजे. मनोमय कोश, प्राणायाम कोश, अन्न कोश, विज्ञान कोश, आनंदमय कोश अशातून जडण घडण झाली तर विकास होतो. त्यासाठी पालकांचा सहभाग गरजेचा आहे.

त्यामुळेच पालकांच्या जनभागीदारीतूनच मुलांचा पंचकोशात्मक विकास होणार आहे, असे प्रतिपादन शिक्षण मंत्रालयाच्या समग्र शिक्षा अभियान अंतर्गत राबविण्यात येत असलेल्या जनभागीदारी उपक्रमाचे राज्य समन्वयक गजानन देसाई यांनी राष्ट्रीय शैक्षणिक धोरण विषयावर बोलताना केले.

वाळपई येथे काणेकर सभामंडपात डॉ. केशव बळीराम हेडगेवार विद्यालयाच्या पालकांसाठी जनभागीदारी कार्यक्रम रविवारी सकाळी घेण्यात आला. यावेळी डॉ. हेडगेवार शाळेचे अध्यक्ष डॉ. अशोक आमशेकर, सचिव प्रकाश गाडगीळ, पालक ॲड. कृत्तिका चोर्लेकर, मुख्याध्यापिका निलांगी शिंदे उपस्थित होत्या.

गजानन देसाई म्हणाले, पूर्वी दहावी, बारावी, पदवी अशी शैक्षणिक नियमावली होती. त्यात आता बदल होत अंगणवाडी, पहिली, दुसरी एक टप्पा, तिसरी, ४ थी पाचवी दुसरा टप्पा, ६ वी, ७ वी ८ वी तिसरा टप्पा, ९ वी, १० वी, ११ वी १२ वी असा चौथा टप्पा असणार आहे. या उपक्रमात सुमारे १.५ कोटी मुले, शिक्षक सहभागी होत आहेत. मुलांचा पाच वर्षे पंचकोशात्मक प्रवास झालाच पाहिजे. प्रकाश गाडगीळ यांनी आभार मानले.