कवळे पंचायतीच्या प्रत्येक ग्रामसभेत उपस्थित होणाऱ्या उपस्थित होणाऱ्या ढवळी भागातील बेकायदा भंगारअड्ड्यांची आज (गुरुवारी) अखेर सरकारी अधिकाऱ्यांनी पंचायत मंडळाच्या उपस्थितीत तपासणी केली. यासंबंधीचा अहवाल जिल्हाधिकाऱ्यांना पाठवल्यानंतर पुढील कारवाई करण्यात येईल, असे सांगण्यात आले.

विशेष म्हणजे या भंगारअड्ड्यांच्या ठिकाणीच कामगारांची निवास व्यवस्था करण्यात आली असून विविध तऱ्हेच्या रसायनांच्या बॅरल आणि इतर साहित्याजवळच गॅस सिलिंडर ठेवून जेवण तयार केले जात असल्याने मोठा धोका निर्माण झाला आहे. एकंदर अनेक गैरप्रकार या तपासणीत उघड झाले आहेत.

ढवळी भागातील बेकायदा भंगारअड्ड्यांचा प्रश्‍न ऐरणीवर आला आहे. कवळे पंचायतीच्या ग्रामसभेत तर हा भंगारअड्ड्यांचा प्रश्‍न कायम चर्चेला येत असतो.

ग्रामसभेतील चर्चा आणि ठरावानुसार पंचायतीने या भंगारअड्ड्यांविरुद्ध कारवाई सुरू केली की भंगारअड्ड्यांचे मालक न्यायालयात जाऊन पंचायतीच्या आदेशाला स्थगिती देतात, त्यामुळे या भंगारअड्ड्यांवर कारवाई करणे मुश्‍किलीचे ठरले होते.

गॅस सिलिंडरमुळे भीती!

या भंगारअड्ड्यांवरच कामगारांची राहण्याची तसेच जेवणाची व्यवस्था करण्यात आली आहे. हे कामगार आपल्या कुटुंबासह या भंगारअड्ड्यातच राहतात आणि गॅस सिलिंडरने जेवणही तयार करतात.

विशेष म्हणजे या भंगारअड्ड्यांत अनेक प्रकारच्या रसायनांची बॅरल्स तसेच इतर साहित्य असल्यामुळे गॅस सिलिंडरची एखादी ठिणगी पडली तर मोठा अनर्थ होऊ शकतो. रसायनांचे साहित्य त्वरित पेट घेऊन स्फोट होण्याची भीतीही स्थानिक नागरिकांनी व्यक्त केली आहे.