Calangute News: डिसेंबर महिन्यात खास करून गोव्यात येणाऱ्या पर्यटकांची संख्या वाढते. गोवा म्हटलं म्हणजे इथले समुद्रकिनारे अनेकांसाठी आकर्षणाचे केंद्रबिंदू असतात, मात्र अनावधानाने या समुद्रकिनाऱ्यांवर होणारे अपघात रोखण्यासाठी आणि पर्यटकांची सुरक्षितता निश्चित करण्यासाठी काही जीवरक्षकांचे पथक या किनाऱ्यांवर कायम तैनाद असते. अनेकवेळा या जीवरक्षकांनी पर्यटकांचे जीव वाचवले आहेत. कांदोळीमधल्या समुद्र किनाऱ्यावर जीवरक्षकांनी तीन हरवलेल्या लहान मुलांची पुन्हा पालकांसोबत भेट घडवून दिली.

हुब्बळी, कर्नाटक येथील हरवलेला एक आठ वर्षांचा मुलगा कांदोळीहून कलंगुट पर्यंत गेला, त्याला गोव्याबद्दल काहीही माहिती नसल्याने तो बऱ्यापैकी घाबरला होता, मात्र दृष्टी मरीनच्या जीवरक्षकांनी त्याला पुन्हा पालकांजवळ नेऊन सोडले.

याप्रमाणेच चंदीगड येथील ११ वर्षांची दोन लहानमुलं पालकांपासून विभक्त झाली होती. नवीन जागेत पालकांना कसं शोधावं हा प्रश्न त्यांच्यासमोर उपस्थित होता, मात्र वेळीच त्यांच्या मदतीला धाव घेत समुद्र किनाऱ्यावरील जीवरक्षकांनी त्यांच्या पालकांना शोधून पुन्हा भेट घडवून दिली.

गोव्याच्या समुद्रकिनाऱ्यावर असलेल्या या जीवरक्षकांमुळे पर्यटक तसेच किनाऱ्यावर फिरायला आलेले स्थानिक सुरक्षित असतात. अलीकडेच या जीवरक्षकांनी बागा समुद्रकिनाऱ्यावर जोरदार लाटेमुळे वाहून गेलेल्या महाराष्ट्रातील एका ३३ वर्षीय पर्यटकाला सुरक्षितपणे किनाऱ्यावर आणत जीवनदान दिले होते.