Drishti Marine: बीचवर जाताय? जीवरक्षक दृष्टी मरीनने दिला 'हा' इशारा

Goa Excessive rain; drishti marine advice not to venture into the rough seas

गोव्यात सुरू असलेल्या धुव्वाधार पावसामुळे आज (रविवार) भारतीय हवामान विभागातर्फे रेड अलर्ट जारी करण्यात आला आहे. त्यामुळे एकंदरीत परिस्थिती पाहता समुद्रकिनारी जाणाऱ्यांना जीवरक्षक एजन्सी दृष्टी मरीन यांनी समुद्रात न जाण्याचा सल्ला दिला आहे.

भारतीय हवामान विभाग (IMD) ने अतिवृष्टीचा इशारा दिल्यामुळे, नागरिकांना सतर्क राहण्याच्या सूचना करण्यात आल्या आहेत.

राज्यात पुढील तीन दिवस मुसळधार पाऊस पडण्याची शक्यता आहे, ज्यामुळे समुद्र खवळलेल्या अवस्थेत आहे. यातच पाण्याची पातळी वाढत असून पाण्याचा प्रवाह तीव्र होत आहे. तसेच पूर्व मध्य अरबी समुद्रावर कमी दाबाचा पट्टा तयार होत आहे. यामुळे दक्षिण कोकण-गोवा समुद्रकिनारी राहणाऱ्यांना काळजी घेण्याचे आवाहन करण्यात आले आहे.

दृष्टी मरीनच्या अधिकाऱ्यांनी दिलेल्या माहितीनुसार, अरबी समुद्रात चक्रीवादळाची परिस्थिती निर्माण झाल्यामुळे लोकांनी उच्च पाण्याची पातळी आणि गोव्याच्या किनारपट्टीवर किंवा समुद्रात जाऊ नये असा सल्ला देण्यात येत आहे.

दरम्यान, राज्यात मुसळधार पावसामुळे शहरी तसेच ग्रामीण जनजीवनही विस्कळीत झाले आहे. गावांना जोडणारे पूल वाहून गेल्यामुळे नागरिकांना त्रास सहन करावा लागत आहे.

ही एकंदरीत परिस्थिती लक्षात घेता, राज्य आपत्ती व्यवस्थापन प्राधिकरण (SDMA) ने दोन्ही जिल्ह्यांमध्ये त्यांचे नियंत्रण कक्ष सक्रिय केले आहेत. पुढील २४ तासांत गोव्यात अतिवृष्टीचा अंदाज आहे.