Chhatrapati Shivaji Maharaj Digital Museum Ponda Goa, Porvorim Town Square Project

पणजी: छत्रपती शिवाजी महाराज यांच्यावर आधारित डिजिटल संग्रहालय फोंड्यात उभारलं जाणार आहे. तर, पर्वरीत टाऊन स्क्वेअर प्रकल्प केला जाणार आहे. यासाठी केंद्राकडून एकूण १८८ कोटी निधी मंजूर करण्यात आला आहे.

केंद्रीय पर्यटन खात्याकडून या प्रकल्पासाठी मोठी निधी मंजूर करण्यात आला आहे. मिळालेल्या माहितीनुसार, फोंड्यातील छत्रपती शिवाजी महाराज यांच्यावर आधारित डिजिटल संग्रहालयासाठी ९७.४७ कोटी रुपये मंजूर करण्यात आले आहेत. तर, पर्वरीतील टाऊन स्क्वेअर प्रकल्पासाठी ९०.७४ कोटी रुपये मंजूर करण्यात आले आहेत.

भारतातील पर्यटन क्षेत्राला चालना देण्यासाठी, पंतप्रधान नरेंद्र मोदी यांच्या नेतृत्वाखालील सरकारने 23 राज्यांमधील 40 प्रकल्पांना राज्य/केंद्रशासित प्रदेशांना भांडवली गुंतवणुकीसाठी विशेष सहाय्य (SASCI) योजनेंतर्गत मान्यता दिलीय. निधीच्या माध्यामातून जागतिक मानकांनुसार प्रतिष्ठित पर्यटन केंद्रे विकसित करण्याचा उद्देश आहे.

3,295.76 कोटी किमतीचे हे प्रकल्प स्थानिक अर्थव्यवस्थेला चालना देण्यासह पर्यटनाद्वारे रोजगार निर्माण करतील, असा विश्वास केंद्राने व्यक्त केला आहे.