सासष्टी: गेल्या 27 वर्षात दिगंबर कामत यांनी मडगावात काहीच केले नाही. त्यांच्यामुळेच या शहराचा विकास खुंटला, अशी टीका उपमुख्यमंत्री बाबू आजगावकर यांनी केली.

बाबू आजगावकर (Babu Ajgaonkar) यांनी न्यू मार्केटमधील पिंपळकट्टयावर जाऊन भाजप मंडळाचे पदाधिकारी, कार्यकर्ते व चाहत्यांच्या उपस्थितीत श्री चरणी नारळ अर्पण केला. आगामी निवडणुकीत विजयासाठी आशीर्वाद घेतले. त्यानंतर कार्यकर्त्यांना मार्गदर्शन केले. ते म्हणाले की मडगावचे काम करण्याची संधी मिळणे हे माझे भाग्य समजतो. आपला मंडळाच्या पदाधिकारी व कार्यकर्त्यांवर पूर्ण विश्र्वास आहे. 

मडगावची (Margao) उमेदवारी मिळेल, याचा आपण कधी विचारच केला नव्हता. पण माझी जन्म व कर्मभूमी असलेल्या मडगावात मला भाजपने (BJP) उमेदवारी देऊन मठग्रामस्थांची सेवा करण्याची संधी दिली. पक्षाने जो विश्र्वास दाखवला तो सर्व कार्यकर्त्यांच्या व मतदारांच्या मदतीने सार्थ करुन दाखवेन,असेही आजगावकर म्हणाले.

गेल्या 27 वर्षांत जो विकास झाला नाही तो या पुढे होईल. पार्किंग, कचरा, वाहतूक समस्या सुटतील. मडगावकर सर्वांपेक्षा जास्त कर भरतात, मात्र त्यामानाने मडगावचा विकास झाला नाही, असेही आजगावकर म्हणाले.

मडगावची सध्याची स्थिती पाहता हे शहर आपले, असे म्हणावे, असे दिसत नाही. जर मडगावचा सर्वांगीण विकास पाहिजे तर सर्व मडगावकरांनी मतभेद विसरून एकत्र येणे व एकजुटीने निवडणुकीस सामोरे जाणे महत्वाचे आहे ,असेही आजगावकर म्हणाले.

यावेळी त्यांच्यासमवेत देश प्रभुदेसाई, बिपीन कंटक, रुपेश महात्मे, सुबोध गोवेकर, सुनील नाईक, शर्मद रायतुरकर, रंजिता पै, चंदन नायक उपस्थित होते.