Goa MLA Disqualification Petition

पणजी: काँग्रेसमधून भाजपमध्ये प्रवेश केलेल्या आमदारांच्या अपात्रता याचिकेप्रकरणी सभापती रमेश तवडवकर यांनी दिलेल्या आदेशाला सर्वोच्च न्यायालयाच्या सूचनेनुसार काँग्रेसचे माजी प्रदेशाध्यक्ष गिरीश चोडणकर यांनी मुंबई उच्च न्यायालयाच्या गोवा खंडपीठात आव्हान दिले आहे. ही याचिका आज (06 जानेवारी) खंडपीठासमोर आली असता त्यावरील सुनावणी येत्या १५ जानेवारीला ठेवण्यात आली.

सभापतींच्या आदेशाविरोधात घटनेच्या कलम १३६ अंतर्गत याचिका दाखल झाली आहे. कलम १३६ नुसार सर्वोच्च न्यायालय याप्रकरणी सुनावणी करू शकत नाही, असे सरन्यायाधीश संजीव खन्ना यांनी चोडणकर यांच्या विशेष याचिकेवर सर्वोच्च न्यायालयातील सुनावणीवेळी स्पष्ट केले होते.

त्यांनी चोडणकरांना कलम २२६ नुसार उच्च न्यायालयात जाण्याचे निर्देश दिले होते. त्यामुळे गिरीश चोडणकर यांनी ही याचिका मागे घेतली होती.

गोवा विधानसभा निवडणूक २०२२ मध्ये होताच त्याच वर्षी सप्टेंबर महिन्यात काँग्रेसच्या दिगंबर कामत, आलेक्स सिक्वेरा, संकल्प आमोणकर, रुडॉल्फ फर्नांडिस, मायकल लोबो, केदार नाईक, दिलायला लोबो, राजेश फळदेसाई या आठ आमदारांनी वेगळा गट स्थापन करून भाजपमध्ये प्रवेश केला होता.

गिरीश चोडणकर यांनी सभापतींकडे या आठ आमदारांना अपात्र करण्याची मागणी करणारी याचिका दाखल केली होती. सभापती रमेश तवडकर यांनी त्यांची याचिका फेटाळून लावली. त्यानंतर चोडणकरांनी नोव्हेंबर २०२२ मध्ये थेट सर्वोच्च न्यायालयात आव्हान याचिका दाखल केली होती.

अवमान याचिका !

आमदार अपात्रतेबाबत काँग्रेसने दाखल केलेल्या याचिकेवर वेळेत निर्णय न दिल्याबाबत काँग्रेस प्रदेशाध्यक्ष अमित पाटकर यांनी सभापती रमेश तवडकर यांच्याविरोधात मुंबई उच्च न्यायालयाच्या गोवा खंडपीठात अवमान याचिका दाखल केली आहे.