पणजी: अयोध्येतील श्रीराम मंदिरासाठी देशभरातील नागरिकांनी कष्टाच्या कमाईतून देणग्या दिल्या. मात्र, त्या देणग्यांमधील आर्थिक गैरव्यवहाराची सर्वोच्च न्यायालयाच्या देखरेखीखाली न्यायालयीन चौकशी करण्यात यावी, अशी मागणी अखिल भारतीय काँग्रेस समितीच्या हिमाचल प्रदेश व चंदीगडच्या प्रभारी तथा माजी खासदार रजनी पाटील यांनी रविवारी केली.

काँग्रेस भवनात झालेल्या पत्रकार परिषदेत त्या बोलत होत्या. यावेळी काँग्रेसचे कार्याध्यक्ष आमदार ॲड. कार्लोस फेरेरा, माध्यम व जनसंपर्क विभागाचे अध्यक्ष अमरनाथ पणजीकर आणि युवक काँग्रेसचे अध्यक्ष अर्चित नाईक उपस्थित होते.

भाजपने राम मंदिराच्या मुद्द्याचा राजकीय लाभ उठवला, हे जनतेला माहीत आहे. त्यामुळे देणग्यांमधील कथित आर्थिक अनियमिततेची सर्वोच्च न्यायालयाच्या देखरेखीखाली न्यायालयीन चौकशी व्हावी आणि या विषयावर संसदेत सविस्तर चर्चा व्हावी, अशी मागणीही त्यांनी केली.