Siolim News: गोव्यात पर्यटनाच्या आकर्षणाने अनेक पर्यटक येत असतात, मात्र काही कारणांमुळे अनेकवेळा त्यांच्या जीवाला धोका निर्माण होतो. एप्रिल महिन्यात कोट्टायम, केरळ येथून गोव्यात पर्यटनासाठी आलेल्या दोन पर्यटकांचा जीव वाचवल्या प्रकरणी गोवा सरकारकडून राज रामा चोडणकर याला मुख्यमंत्री शौर्य पुरस्कार जाहीर झाला आहे. या पुरस्कारामध्ये त्याला १ लाख रुपयांचा इनाम बहाल केला जाईल.

राज चोडणकर हा एक मच्छिमारी आहे आणि रात्रीच्यावेळी मासे पकडत असताना त्याला अचानक शापोरा समुद्रात दोन मनुष्य बुडताना आढळले. ९ एप्रिल २०२३ ची घटना असून राज याने त्या पर्यटकांना सुरक्षित किनाऱ्यावर आणले होते. होडीतील जीवरक्षक जॅकेट आणि दोरीच्या साहाय्याने आपण पर्यटकांचा जीव वाचवला असल्याची माहिती राज चोडणकर याने गोव्यातील एका वृत्तवाहिनीला दिली होती.

त्याच्या या कार्याची सरकारने दखल घेतली याबद्दल त्याने सरकारचे आभार मानले आहेत, शिवोलीच्या आमदार डिलायला लोबो यांनी दिलेल्या शब्दाप्रमाणे हा पुरस्कार मिळवून दिल्याबद्दल त्याने मुख्यमंत्री डॉ. प्रमोद सावंत आणि आमदार डिलायला लोबो यांचे आभार मानले आहेत. आत्तापर्यंत शिवोलीत हा पुरस्कार इतर कोणालाही मिळालेला नाही अशी माहिती त्याने माध्यमांना दिली.

राज चोडणकर याने दाखवलेल्या शौर्याबद्दल त्याचे राज्यभरातून कौतुक केले जात आहे, तसेच लोकं त्याचे भरभरून अभिनंदन करत आहेत.