Goa Tourist Death: बायणा समुद्रकिनाऱ्यावरील पर्यटकाच्या मृत्यूचं कोड उलगडलं; पोस्टमार्टम रिपोर्टमधून सत्य आलं समोर!

पणजी: बायणा समुद्रकिनाऱ्यावर पर्यटकाचा मृत्यू कशामुळे झाला, याचे प्राथमिक कारण शवविच्छेदनातून उघड झाले आहे. हृदयविकाराच्या झटक्याने संजय यांचा मृत्यू झाल्याचं अहवालातून समोर आले आहे. रविवारी (10 नोव्हेंबर) एका पर्यटकाचा जलक्रीडेदरम्यान मृत्यू झाला होता आणि या प्रकरणात संशयाची सुई ही साहसी खेळांमध्ये पर्यटकांच्या सुरक्षेकडे होणाऱ्या दुर्लक्षाकडे वळली होती.

बंगळुरूत राहणारे संजय श्रीनिवास हे कुटुंबासह गोव्यात आले होते. रविवारी जलक्रीडा आणि अन्य साहसी खेळांसाठी संजय आणि त्यांचे कुटुंब बायणा समुद्रकिनाऱ्यावरून बोटीने निघाले होते. पॅरासेलिंग झाल्यावर स्कुबा डायव्हिंगसाठी जाताना संजय यांना बोटीतच अस्वस्थ वाटू लागले. त्यांना किनाऱ्यावर आणून तातडीने रुग्णालयात दाखल करण्यात आले. मात्र, रुग्णालयात डॉक्टरांनी त्यांना मृत घोषित केले होते.

राज्यातील समुद्रकिनाऱ्यावर जलक्रीडा आणि साहसी खेळांचे आयोजन करणाऱ्या एजंट्सनी धुमाकूळ घातला आहे. ते पर्यटकांकडून अवाजवी पैसे घेतात. मात्र त्यांच्या सुरक्षेकडे डोळेझाक करतात, अशी माहिती स्थानिक नागरिकांकडून देण्यात आली. दरम्यान, राज्यात पर्यटन हंगाम सुरु झाला आहे. देश-विदेशातील पर्यटक मोठ्या संख्येने गोव्यात दाखल होत आहेत. समुद्रकिनाऱ्यावर मोठी गर्दी पाहायला मिळत आहे. त्यामुळे पर्यटकांच्या सुरक्षेच्या दृष्टीने योग्य ती खबरदारी घेण्यात यावी अशी मागणी आता या घटनेनंतर होऊ लागली आहे.