पणजी: मुख्यमंत्री डॉ. प्रमोद सावंत यांनी परदेश दौऱ्यादरम्यान अबूधाबी येथील यास मरिना सर्किट या फॉर्म्युला वन शर्यतींसाठी प्रसिद्ध असलेल्या आंतरराष्ट्रीय दर्जाच्या रेस ट्रॅकला भेट दिली. गोव्यात नुकत्याच यशस्वीरीत्या पार पडलेल्या फॉर्म्युला-४ स्पर्धेनंतर ही भेट झाल्याने राज्याच्या स्पर्धात्मक मोटार क्रीडा क्षेत्रातील वाढत्या स्वारस्याचे प्रतिबिंब दिसून येते.

आगामी काळात गोव्याला जागतिक मोटार क्रीडा स्पर्धांचे उदयोन्मुख केंद्र म्हणून विकसित करण्याचा राज्य सरकारचा मानस असल्याचेही त्यांनी स्पष्ट केले. या भेटीदरम्यान मुख्यमंत्र्यांनी ट्रॅक व्यवस्थापन प्रणाली, सुरक्षा उपाययोजना, प्रेक्षकांसाठीच्या सुविधा तसेच स्पर्धा आयोजनाशी संबंधित विविध बाबींचा आढावा घेतला.

त्यांनी आयोजकांशी संवाद साधत जागतिक दर्जाच्या पायाभूत सुविधा आणि कार्यपद्धतींची माहिती घेतली. जागतिक स्तरावरील सुविधा आणि संचालन मानके प्रत्यक्ष पाहिल्यामुळे गोव्यातील मोटार क्रीडा क्षेत्र अधिक सक्षम आणि विकसित करण्यास मदत होईल, असा विश्वास सावंत यांनी व्यक्त केला.

राज्यातील क्रीडांगणे आणि सुविधा विकसित करणे, युवकांना प्रोत्साहन देणे तसेच आंतरराष्ट्रीय दर्जाच्या मोटार शर्यती गोव्यात आयोजित करणे यासाठी सरकार कटिबद्ध असल्याचे त्यांनी अधोरेखित केले.