आगोंद: काणकोण नगरपालिकेवर प्रशासक म्हणून गणेश गावकर यांची नियुक्ती झाल्यानंतर येत्या मे महिन्याच्या शेवटच्या आठवड्यात पालिका निवडणूक होण्याची शक्यता वर्तवली जात आहे. या पार्श्वभूमीवर इच्छुक उमेदवारांनी आतापासूनच कंबर कसत निवडणुकीची तयारी सुरू केली आहे.

यंदाच्या निवडणुकीत मंत्री रमेश तवडकर यांच्या गटासह विद्या प्रबोधिनी मंडळाचे अध्यक्ष चेतन देसाई यांच्या पॅनलमध्ये खरी चुरस पाहायला मिळणार आहे. त्यामुळे राजकीय वातावरण तापू लागले असून विविध भागातील इच्छुकांनी गुडघ्याला बाशिंग बांधत आपापले आराखडे आखण्यास सुरुवात केली आहे.

काणकोण नगरपालिकेतील प्रभाग संख्या पूर्वीप्रमाणेच १२ राहणार असून पालिकेतील मतदारसंख्या ९,५८३ इतकी आहे. यंदा सुमारे ६०० मतदारांची घट झालेली दिसून येते. तर नवीन मतदार यादीनुसार काणकोण मतदारसंघातील एकूण मतदारसंख्या ३२,८२७ इतकी आहे.

आगामी निवडणुकीत विविध पक्षांची भूमिका महत्त्वाची ठरणार असून त्यावर पुढील राजकीय समीकरणे अवलंबून राहणार आहेत. ही पालिका निवडणूक आगामी विधानसभा निवडणुकीची नांदी मानली जात असल्याने सर्वच पक्षांनी हालचालींना वेग दिला आहे.