पणजी : कांपाल परिसरातील एका हॉटेलमध्ये मध्यरात्रीच्या सुमारास अज्ञात चोरट्यांनी धाडसी चोरी केल्याची घटना उघडकीस आली आहे. चोरट्यांनी तीन महागडे मोबाईल तसेच अंदाजे ३० हजार रुपयांपर्यंत रोख रक्कम लंपास केली. यामध्ये काही अमेरिकन डॉलर्सचाही समावेश असल्याची माहिती मिळाली आहे.

दोन खोल्यांमध्ये चोरी झाली असून दोन्ही खोल्यांत विदेशी पर्यटक राहत होते. शांत व सुरक्षित म्हणून ओळखल्या जाणाऱ्या या परिसरात घडलेल्या घटनेमुळे हॉटेल व्यावसायिकांमध्ये आणि स्थानिक नागरिकांमध्ये अस्वस्थता निर्माण झाली आहे.

दरम्यान, पर्यटन सुरक्षेबाबत प्रशासन गंभीर असून रात्रीची गस्ती वाढवली जात आहे. हॉटेल संघटनांशी समन्वय साधून सुरक्षा व्यवस्था अधिक मजबूत केली जाईल, असे पोलिसांनी स्पष्ट केले आहे.

वाढत्या चोऱ्यांमुळे चिंता

याबाबत पणजी पोलीस स्थानकात तक्रार नोंदविण्यात आली आहे. प्राथमिक माहितीनुसार, हॉटेल व परिसरातील सीसीटीव्ही फुटेज तपासले जात आहे. कांपालमधील ही घटना एकटी नसून, गेल्या काही वर्षात गोव्यातील पर्यटन क्षेत्रांमध्ये अशाच प्रकारच्या चोरीच्या घटना समोर आल्या आहेत. या प्रकरणात पोलिसांनी सखोल तपासाचे आश्वासन दिले असले तरी, वारंवार होणाऱ्या चोरीच्या घटनांमुळे हॉटेल मालक व रहिवासी चिंतेत आहेत.