सासष्टी: भाजप सरकारने गोव्यासाठी पुढील १०० वर्षांच्या विकासाचा विचार करून भरघोस तरतूद करून ठेवली आहे. डबल इंजिन सरकारने गोव्यात ३० हजार कोटी रुपयांच्या साधनसुविधा उभारल्या आहेत.

काँग्रेस पक्षाला त्यांच्या कार्यकाळात जे जमले नाही, ते भाजप सरकारने गत १० वर्षांत करून दाखवले आहे. गोमंतकीयांसाठी विविध योजना व उपक्रम राबविले आहेत, असे मुख्यमंत्री डॉ. प्रमोद सावंत यांनी नावेली मतदारसंघातील कार्यकर्ता मेळाव्यात सांगितले.

यावेळी प्रदेशाध्यक्ष दामू नाईक, नावेलीचे आमदार उल्हास तुयेकर, माजी सभापती विश्र्वास सतरकर, राज्य सचिव सर्वानंद भगत, दक्षिण गोवा जिल्हा भाजप अध्यक्ष प्रभाकर गावकर, जिल्हा पंचायत सदस्य परेश नाईक, दवर्लीचे सरपंच साईश राजाध्यक्ष, मंडळाचे पदाधिकारी व कार्यकर्ते मोठ्या संख्येने उपस्थित होते.

प्रदेशाध्यक्ष दामू नाईक यांनी कार्यकर्त्यांना मार्गदर्शन करताना सांगितले, की सरकारी योजना व पक्षाची ध्येय धोरणे प्रत्येक नागरिकांपर्यंत पोहोचविणे हे कार्यकर्त्याचे काम आहे. आम्हाला कार्यकर्ते केवळ निवडणुकांपुरते नको आहेत. त्यांनी नियमीत मतदारांच्या संपर्कात असावे ही आमची अपेक्षा आहे. नावेलीचे आमदार उल्हास तुयेकर यांनी आपल्या मतदारसंघातील समस्या सरकार मार्फत लवकरात लवकर सोडविल्या जातील, असे सांगितले.

स्वयंसेवी संस्थांची संख्या ५०० पर्यंत नेणार

दीनदयाळ स्वास्थ्य योजनेंतर्गत सरकार वर्षाकाठी ७० कोटी रुपये खर्च करीत आहे. मनुष्यबळ विकास संसाधन महामंडळ स्थापन करून पुढील दोन वर्षांत ४ हजार नोकऱ्या जाहीर केल्या जातील. तसेच सध्या गोव्यात ३४२ स्वयंसेवी संस्था असून त्यात ४८ हजार महिला काम करीत आहेत. पुढील वर्षी स्वयंसेवी संस्थांची संख्या ५०० पर्यंत नेण्याचे व एक लाख महिलांना रोजगार देण्याचे आमचे लक्ष्य असल्याचे मुख्यमंत्री डॉ. प्रमोद सावंत यांनी सांगितले.