डिचोली: भर रस्त्यावर चूल पेटवून अन्नपदार्थ शिजवणाऱ्या परप्रांतीय कुटुंबाआड डिचोली पालिकेने कारवाई करताना त्यांना हुसकावून लावले. हा प्रकार (शुक्रवारी) सकाळी शहरातील ‘सेतू संगम’ प्रकल्पस्थळी घडला.

यासंबंधीची माहिती अशी की, शहरातील ''सेतू संगम'' प्रकल्पाच्या प्रवेशद्वारा समोरील जंक्शनवर चूल पेटवून एक महिला चपात्या भाजत होती. या महिलेसोबत दोन पुरुष आणि तीन लहान मुले होती. कोणाचीही पर्वा न करता या कुटुंबाकडून घरात स्वयंपाक करत असल्याच्या थाटात साधारण तासभर हा प्रकार चालू होता.

भर रस्त्यावर हा प्रकार चालू असल्याने तेथून ये-जा करणाऱ्यांच्या भुवया उंचावल्या होत्या. अनेकांनी या प्रकाराबाबत आश्चर्यही व्यक्त केले. डिचोली पालिकेला या प्रकाराची माहिती मिळताच पालिकेच्या पर्यवेक्षकांनी त्याठिकाणी येऊन त्यांना समज देत तेथून हुसकावून लावले. पालिकेच्या या कारवाईनंतर या कुटुंबाने तेथून गाशा गुंडाळला.

मिळालेल्या माहितीनुसार, भर रस्त्यावर अन्न शिजविणारे संबंधित कुटुंब हे उत्तरप्रदेशमधील असून मजुरीनिमित्त ते आजच गोव्यात आले आहे. पर्यटक किंवा कामगारवर्गाकडून शहरात रस्त्यावर वा उघड्यावर अन्नपदार्थ शिजवण्याचे प्रकार घडल्यास ते खपवून घेतले जाणार नाहीत, असा इशारा नगराध्यक्ष विजयकुमार नाटेकर यांनी दिला आहे.

कडक कारवाई हवी!

राज्यात अनेक ठिकाणी अशा प्रकारे उघड्यावर मजूर लोक जेवण तयार करतात. हा प्रकार धोकादायक असून जवळच्या मालमत्तेला आग लागण्याची शक्यता असते. काही ठिकाणी पर्यटकही रस्त्यांच्या बाजूला वाहन उभे करून जेवण तयार करतात, त्याच ठिकाणी इतर विधीही करतात. असे प्रकार थांबविण्यासाठी पंचायत, नगरपालिका पातळीवर कडक कारवाई होणे आवश्‍यक आहे, असे मत ग्रामस्थ व्यक्त करीत आहेत.