बागा: गोवा जरी पर्यटनासाठी प्रसिद्ध असला तरीही काही पर्यटक इथे येऊन दारूच्या नशेत बेभान वागतात, बेधुंद होऊन वावरतात आणि याचा त्रास स्थानिकांना सहन करावा लागतो. शनिवारी (दि. १७) पहाटे बागा परिसरात एका पर्यटकाने अक्षरशः गोंधळ उडवून दिल्याने भल्या पहाटे परीसरात खळबळ मातली होती. बंगळूरुहून आलेल्या या पर्यटकाने भाड्याची कार चालवत असताना अनेक वाहनांना धडक दिली होती.

स्थानिकांच्या म्हणण्यानुसार हा पर्यटक दारूच्या नशेत होता आणि त्याच अवस्थेत त्याने वेगवेगळ्या गाड्यांना धडक दिली. अखेरीस त्याने एका पाण्याच्या टँकरला धडकल्यानंतर त्याची गाडी थांबली.

स्थानिकांना मारहाण आणि शिवीगाळ

या घटनेनंतर बंगळूरहून या पर्यटकाने स्थानिक लोकांशी गैरवर्तन करण्यास सुरुवात केली, त्यांना मारहाण आणि शिवीगाळ केली, असा आरोप स्थानिकांनी केला आहे. त्यामुळे संतप्त झालेल्या जमावाने त्याला पोलिसांच्या ताब्यात देईपर्यंत बांधून ठेवले.

सार्वजनिक सुरक्षिततेबद्दल चिंता वाढली

पोलिसांना या घटनेची माहिती मिळताच ते घटनास्थळी दाखल झाले आणि बंगळूरच्या पर्यटकाला ताब्यात घेतलं. पोलिसांनी ताब्यात घेतल्यानंतरही परिस्थिती नियंत्रणात नव्हती.

या व्यक्तीने पोलीस कर्मचाऱ्यांशी आणि रुग्णवाहिकेच्या नर्स व चालकासह वैद्यकीय कर्मचाऱ्यांशीही गैरवर्तन केल्याचे वृत्त आहे.

स्थानिकांच्या म्हणण्यानुसार, हा पर्यटक घटनेच्या वेळी "नशेच्या" अवस्थेत होता, ज्यामुळे परिसरातील सार्वजनिक सुरक्षिततेबद्दल चिंता वाढली आहे. पोलीस या प्रकरणाचा अधिक तपास करत आहेत.