Dicholim: कीर्तन परंपरेला मोठी संस्कृती असून, ही परंपरा पुढे नेण्यासाठी नवोदित बाल कीर्तनकार तयार होणे आवश्यक आहे. असे मत डिचोलीचे आमदार तथा सभापती राजेश पाटणेकर (Rajesh Patnekar) यांनी डिचोलीत बोलताना व्यक्त केले.

हरिभक्त परिषद गोमंतक आयोजित 42 व्या कीर्तनकार स्नेहसंमेलनाच्या उदघाटन सोहळ्यात ते प्रमुख पाहूणे या नात्याने बोलत होते. शांतारामनगर-बोर्डे येथील वृंदा दीनानाथ तारी सभागृहात हे संमेलन सुरु आहे.

समाज प्रबोधनाचे माध्यम

प्रमुख वक्ते या नात्याने बोलताना गोवा विद्यापीठाचे (Goa University) मराठी विभाग प्रमुख प्रा. विनय बापट यांनी कीर्तन हे समाज प्रबोधनाचे माध्यम आहे. असे सांगून कीर्तन परंपरेविषयी उपयुक्त माहिती कथन केली.

स्नेहसंमेलनाचे थाटात उदघाटन

श्री सिद्धिविनायक मंदिराकडून नामदिंडी झाल्यानंतर श्री नारदमूर्तीचे संमेलनस्थळी आगमन आणि पूजन होणार करण्यात आले. वैदिक प्रार्थना झाल्यानंतर नारदिय कीर्तन विद्यालय वाळपईच्या बालकीर्तनकार स्वतेजा कुंभार हिने मंगलाचरण सादर केले. वेदमूर्ती तथा ज्येष्ठ कीर्तनकार ह. भ. प. नारायणबुवा फडके यांच्या हस्ते या स्नेहसंमेलनाचे उदघाटन करण्यात आले.

यावेळी संमेलनाध्यक्ष ह. भ. प. भालचंद्रबुवा सिद्ध्ये, ह. भ. प. आनंदबुवा घैसास, हरिभक्त परिषदेचे अध्यक्ष उदयबुवा फडके, स्वागताध्यक्ष दीनानाथ तारी आदींची उपस्थिती होती. उदयबुवा फडके यांनी मनोगत व्यक्त केले. दीनानाथ तारी यांनी स्वागत केले. सूत्रसंचालन देवेंद्र साठे यांनी केले. यावेळी आनंदबुवा घैसास यांच्या पुस्तकाचे प्रकाशन झाले.

उदघाटन सत्रानंतर ह. भ. प. किरणबुवा तुळपुळे यांच्या कीर्तनाने स्नेहसंमेलनाला सुरवात झाली. सायंकाळच्या सत्रात बालकीर्तनकार कु. सायली भिडे आणि कु. आभा पित्रे यांची कीर्तन जुगलबंदी रंगली. नंतर कीर्तनचक्रीत ह. भ. प. उत्कर्षा रेवाडकर, नूतन रेवाडकर, श्रेयस गाडगीळ, प्राजक्ता जोशी, ह. भ. प. कृष्णा गावस आणि ह. भ. प. भालचंद्र भावे यांचा सहभाग होता. ह. भ. प. दीनानाथ तारी, आणि अन्य कीर्तनकारांचे कीर्तन झाले.