Goa Nightclub Fire Update : हडफडे येथील ‘बर्च बाय रोमिओ लेन क्लब’मधील अग्नितांडव प्रकरणातील मुख्य संशयित सौरभ आणि गौरव या लुथरा बंधूंनी दाखल केलेला जामीन अर्ज म्हापसा अतिरिक्त जिल्हा व सत्र न्यायालयाने नाकारला.

त्यामुळे लुथरा बंधूंचा कोलवाळ कारागृहातील मुक्काम वाढला आहे. ६ डिसेंबर २०२५ च्या रात्री बर्च क्लबला भीषण आग लागली होती. यात क्लबमधील कर्मचारी आणि पर्यटकांसह मिळून २५ निष्पाप लोकांचा मृत्यू झाला होता.

अश्रू झाले अनावर

म्हापसा सत्र न्यायालयाने आज लुथरा बंधूंचा जामीन अर्ज फेटाळला. सुनावणीला संशयित लुथरा बंधूंच्या पत्नींसह बहीण आणि इतर नातेवाईक उपस्थित होते. दोघांचाही जामीन फेटाळल्याने नातेवाईकांना अश्रू अनावर झाले होते.

न्यायालयात काय घडले?

गुरुवारी सायंकाळी सुनावणीवेळी लुथरा बंधूंचे नातेवाईक तसेच सरकारी आणि संशयितांची बाजू मांडणाऱ्या वकिलांची टीम न्यायालयात हजर होती. दिल्लीतील पीडित पर्यटक जोशी कुटुंबीयांचे दोघे सदस्यही आज उपस्थित होते.

संशयितांचे वकील ॲड. पराग राव म्हणाले की, न्यायालयाने जामीन अर्ज कोणत्या कारणावरून फेटाळला, हे निवाड्याची प्रत मिळाल्यानंतरच समजेल. आम्ही त्यावर अभ्यास करू. अशिलांच्या संमतीनंतरच वरिष्ठ न्यायालयात या निवाड्याला आव्हान देण्याचा निर्णय घेऊ.

जोशी कुटुंबीयांतर्फे ॲड. सुहास जोशी म्हणाले की, न्यायालयाने लुथरा बंधूंचा जामीन नामंजूर केल्याने या दुर्घटनेत मृत्युमुखी पडलेल्या २५ जणांच्या कुटुंबीयांसाठी हा न्यायाचा दिवस आहे.

संशयितांना या प्रकरणात जास्तीत जास्त शिक्षा व्हावी, यासाठी आम्ही प्रयत्न करणार आहोत.