नागवा हडफडे येथे शनिवारी पहाटे दारूच्या नशेत तरुणांच्या टोळक्याने आपल्याच मित्रावर सपासप वार करून चाकूने भोसकल्याची घटना घडली होती. यात रवी शिरोडकर (30) हा युवक जबर जखमी झाला होता. या युवकाला गोमेकॉत दाखल करण्यात आले आहे. दरम्यान पोलिसांनी टारझन पार्सेकर या तरुणाला या प्रकरणात गजाआड केले होते. आता हणजूण पोलिसांनी आणखी चार जणांना अटक केली आहे.

(Anjuna Police have arrested 04 more accused persons in connection with stabbing Ravi Shirodkar)

मिळालेल्या माहितीनुसार हडफडे येथे नागवा सर्कल जवळ ही घटना घडली. बाईक व्यावसायिक रवी शिरोडकर हा रात्री एका पार्टीला गेला होता. पहाटे साडे तीनच्या सुमारास याला मित्राचा फोन आला, त्यानंतर तो पुन्हा मित्रांबरोबरच बाहेर पडला. तो व त्याचे काही मित्र नागवा सर्कलजवळ उभे असताना इनोव्हा व बलेनो कारमधून आठ ते दहाजण या ठिकाणी आले. ज्यातील चार- पाच जणांनी रवीवर सुरीने हल्ला केला.

यात नागवा येथील संशयित टारझन पार्सेकर व आणखी तिघांनी रवीच्या पोटावर सुऱ्याने वार केले होते. पार्सेकर तर पोलिसांच्या ताब्यात आहे. यात आणखी चार जणांना पोलिसांनी अटक केली. 1. शैलेश चंदू नाईक रा. कामुर्ली बार्देश गोवा, 2. सिद्धांत मांद्रेकर रा. साळगाव, 3. अमन रोहिदास शिरोडकर रा. साळगाव आणि 4. प्रशांत दासा राजू रा. नागोवा. अशी अटक केलेल्यांची नावे आहेत.

हल्ला पूर्वनियोजित : उदय शिरोडकर

चाकूहल्ल्यात जखमी झालेला रवी शिरोडकर हा बागा येथील श्री बाबरेश्वर देवस्थान समितीचे माजी अध्यक्ष उदय शिरोडकर यांचा चुलत भाऊ आहे. हा हल्ला पूर्वनियोजित असून हणजूण पोलिसांनी आरोपींची कसून चौकशी करून त्यांना गजाआड करण्याची मागणी शिरोडकर यांनी केली आहे.