पणजी: मागील दोन मोसमात उल्लेखनीय ठरलेला तरुण बचावपटू जय गुप्ता याच्या संघ बदल प्रक्रियेमुळे एफसी गोवास मोठा मोबदला मिळाला. आगामी कारकिर्दीत तो कोलकात्यातील ईस्ट बंगाल संघातून खेळेल.

एफसी गोवाने मंगळवारी सोशल मीडियाद्वारे जय गुप्ताला करारमुक्त केल्याचे जाहीर केले. त्याचवेळी खेळाडू संघ बदल करारांतर्गत भारतीय खेळाडूसाठी मोजलेली क्लब पातळीवरील ही विक्रमी रक्कम असल्याचे एफसी गोवाने नमूद केले. नेमकी रक्कम उघड करण्यात आलेली नाही.

जय गुप्ता २३ वर्षांचा आहे. २०२३-२४ व २०२४-२५ असे दोन मोसम तो एफसी गोवा संघातर्फे खेळला. दोन्ही मोसमात एफसी गोवाने इंडियन सुपर लीग (आयएसएल) फुटबॉल स्पर्धेची उपांत्य फेरी गाठली. तो संघात असताना २०२५ मध्ये संघाने सुपर कपही जिंकला.

एफसी गोवातर्फे जय एकूण ४२ सामने खेळला. एकंदरीत दहा सामन्यांत क्लीन शीट राखली. त्याने दोन गोल व तीन असिस्टचेही योगदान दिले. २०२३-२४ मध्ये २५ सामने खेळला, नऊ क्लीन शीटसह त्याने दोन गोलही नोंदविले होते. गतमोसमात तो १७ सामने खेळला.जय गुप्ताला पुढील वाटचालीसाठी एफसी गोवाने शुभेच्छा दिल्या आहेत.