पणजी: ‘रोटरी रेन रन’मधील २१ किलोमीटर मुख्य शर्यतीत नौदलाचा अंकितकुमार यादव आणि बंगळूरची दीपिका प्रकाश यांची धाव अव्वल ठरली. स्पर्धेत गोवा आणि कर्नाटकातील मिळून सुमारे २५ पॅरा ॲथलीट्सचा उत्साहही वाखाणण्याजोगा ठरला.

रेन रनचे यंदा दहावे वर्ष होते. या उपक्रमातून उभा झालेला निधी ‘प्रकाश कर्करोग मदत’ प्रकल्पास देण्यात आला. महिला आरोग्य व शिक्षणाचा संदेश या उपक्रमातून देण्यात आला. स्पर्धेत देश-विदेशातील मिळून दोन हजारापेक्षा जास्त धावपटूंनी भाग घेतला.

पर्वरी रोटरी क्लबतर्फे घेण्यात आलेल्या या शर्यतीच्या प्रारंभ बांबोळी येथील ॲथलेटिक्स स्टेडियमवर २ एसटीसीचे उप कमांडंट कर्नल राजीव राघवन यांच्या हस्ते झाला.

पुरुषांच्या २१ किलोमीटर शर्यतीत प्रेम कुमार याने दुसरा, तर जपानच्या रिओहेई ताकाहाशी याने तिसरा क्रमांक मिळविला. महिलांत रशियाची गालिना कुझ्मिना हिने दुसरा, तर फ्रान्सच्या हान्सिन बेनोई हिने तिसरा क्रमांक प्राप्त केला. १८ ते ४४ वर्षे वयोगटात १० किलोमीटर शर्यतीत धारबांदोड्याचा हरी वेळीप पुरुषांत, तर मडगावची अयान सुवारिस महिलांत प्रथम स्थानी राहिली.

२१ किलोमीटर विजेत्या अंकित याने एक तास, २० मिनिटे आणि ३१ सेकंदांत शर्यत पूर्ण केली. ३६ वर्षीय दीपिका हिने एक तास, ४३ मिनिटे व पाच सेकंद वेळ नोंदविला. १० किलोमीटर शर्यतीत हरी याने ३८ मिनिटे व ५७ सेकंद, तर महिलांत अयान हिने ५२ मिनिटे व ११ सेकंद वेळ नोंदविली.