पणजी: भारतीय क्रिकेट नियामक मंडळाच्या (बीसीसीआय) निवडणूक २०२५ चे निवडणूक अधिकारी ए. के. जोती यांनी शनिवारी मतदार यादी मसुद्यात गोवा क्रिकेट असोसिएशनचे (जीसीए) प्रतिनिधी म्हणून बीसीसीआय संयुक्त सचिव रोहन गावस देसाई यांचे नाव समाविष्ट केले. संध्याकाळी जाहीर झालेल्या या यादीनुसार, येत्या २८ रोजी होणाऱ्या आमसभा आणि निवडणूक प्रक्रियेत जीसीएचे प्रतिनिधित्व रोहन करतील.

शुक्रवारी दुपारी दोन वाजता मुंबई उच्च न्यायालयाच्या निर्देशानुसार जीसीए व्यवस्थापकीय समितीची बैठक झाली, तेव्हा पाच सदस्यांनी रोहन यांच्या नावाची शिफारस करून बहुमताचे ठराव मंजूर केला होता, तसेच सचिव शंभा नाईक देसाई यांनी बैठकीत बीसीसीआय आमसभेसाठी अध्यक्ष विपुल फडके यांचे नाव सुचविले.

त्यानंतर बैठकीत बीसीसीआय आमसभा प्रतिनिधी म्हणून कोणाच्याच नावावर शिक्कामोर्तब न झाल्यामुळे अंतिम निर्णय होऊ शकला नव्हता, तसेच रोहन यांच्यासाठी बहुमताने घेतलेल्या ठरावाची प्रत जीसीए सीईओने उपलब्ध केली नाही. बीसीसीआय निवडणूक अधिकाऱ्यास प्रतिनिधी नेमणूक पत्र पाठविण्याची शुक्रवारी रात्री आठपर्यंत मुदत होती.

ती टळून जात असताना जीसीए सीईओतर्फे बीसीसीआय निवडणूक अधिकाऱ्यास कोणाचेही नाव पाठविण्यास असमर्थ असल्याचे पत्र ईमेलद्वारे पाठविण्यात आला. त्यामुळे रोहन देसाई जीसीएचे बीसीसीआय आमसभेत प्रतिनिधित्व करू शकणार नाहीत, तसेच संयुक्त सचिवपदाची निवडणूक लढवू शकता नसल्याचा निष्कर्ष निघाला.

जीसीए संयुक्त सचिव रूपेश नाईक यांनी बीसीसीआय निवडणूक यादी मसुद्यासाठी जीसीए नियुक्ती प्रतिनिधीचे नाव पाठविण्याची मुदत संपण्यापूर्वी गोवा खंडपीठाच्या आदेशाची प्रत, तसेच बहुसंख्य पाच जीसीए सदस्यांना पत्र फिरवून माझे नाव पाठविण्याच्या ठरावाची प्रत बीसीसीआय निवडणूक अधिकारी कार्यालयात शुक्रवारी पाठविली. त्यानुसार आज माझ्या नावाचा मतदार यादीत समावेश झाला.’’

- रोहन गावस देसाई