पणजी: गोवा विधानसभा निवडणुकीसाठीचा प्रचार कालावधी शनिवारी संध्याकाळी 6 वाजता संपला. मात्र, काही उमेदवार गुप्त प्रचार करत असल्याचे चित्र समोर येत आहे. कुचेली-खडपावाडा येथे शनिवारी रात्री भरारी पथकाने पकडलेल्या दुचाकीत 11 हजार रुपये सापडले. पोलिस पुढील चौकशी करत आहेत. म्हापसा येथे देखील पोलिसांनी कारवाई केली आहे. (Goa Election News)

केपे मतदारसंघात शनिवारी रात्री काँग्रेस आणि भाजपाचे कार्यकर्ते आमनेसामने आले होते. भाजपाचे (BJP) कार्यकर्ते मतदारांना पैसे वाटत असल्याचा आरोप काँग्रेसच्या (Congress) कार्यकर्त्यांनी केला असून यासंबंधित व्हिडिओ सोशल मीडियावर व्हायरल झाले आहेत. मात्र, अद्याप पोलिसांकडून याबाबत दुजोरा मिळू शकलेला नाही.

गोव्यात (Goa) प्रचारतोफा शनिवारी थंडावल्या असून सोमवारी मतदान होणार आहे. मात्र, त्यापूर्वी राजकीय वातावरण तापल्याचे दिसते. केपे (Quepem) मतदारसंघात काँग्रेसचे उमेदवार एल्टन डिकोस्टा यांच्या कार्यकर्त्यांनी भाजपावर गंभीर आरोप केले आहेत. भाजपाचे उमेदवार चंद्रकांत कवळेकर (Chandrakant Kavalekar) यांचे कार्यकर्ते केपे येथील मतदारांना रात्री उशीरा पैसे वाटत होते, असा आरोप काँग्रेसच्या कार्यकर्त्यांनी केला आहे.

राज्यात सर्वत्र कलम 144 लागू करण्यात आले आहे. परिणामी, पाच किंवा त्यापेक्षा अधिक जणांना एकत्र येता येत नाही. खासगी वाहने फिरवता येत नाहीत. हे नियम असताना देखील पुढील काही तासात गुप्त प्रचार होण्याची शक्यता नाकारता येत नाही.