Congo Mine Accident: पूर्व कांगोमधील उत्तर किवू प्रांतात निसर्गाचा एक अत्यंत भयानक आणि हृदयद्रावक कोप पाहायला मिळाला. येथील रुबाया कोल्टन खाण क्षेत्रात झालेल्या भीषण भूस्खलनामुळे अनेक खाणीत हाहाकार उडाला असून या दुर्घटनेत आतापर्यंत 200 हून अधिक लोकांचा मृत्यू झाला आहे. ढिगाऱ्याखाली अद्यापही अनेक लोक अडकले असल्याने मृतांचा आकडा आणखी वाढण्याची भीती व्यक्त केली जात आहे.

28 जानेवारी, बुधवारी झालेल्या मुसळधार पावसामुळे डोंगराचा भाग खाणींवर कोसळला आणि ही खळबळ उडाली. या दुर्घटनेत केवळ खाण कामगारांचाच जीव गेला नाही, तर तिथे जवळच असलेल्या बाजारपेठेत काम करणाऱ्या महिला आणि निरागस मुलांचाही मोठ्या संख्येने बळी गेला.

M23 या विद्रोही गटाच्या नियंत्रणाखाली असलेल्या या परिसरात सध्या बचावकार्य सुरु असले तरी, चिखल आणि ढिगाऱ्यामुळे त्यात मोठे अडथळे येत आहेत. प्रशासकीय सूत्रांनी दिलेल्या माहितीनुसार, मृतांची संख्या 227 पर्यंत पोहोचली असण्याची शक्यता आहे. काही लोकांना जखमी अवस्थेत ढिगाऱ्याखालून बाहेर काढण्यात यश आले असून त्यांच्यावर स्थानिक आरोग्य केंद्रांमध्ये उपचार सुरु आहेत. यातील गंभीर जखमींना पुढील उपचारांसाठी रुग्णवाहिकेने गोमा शहरात नेण्याची तयारी सुरु आहे.

रुबाया हे क्षेत्र कोल्टन उत्पादनासाठी जागतिक स्तरावर प्रसिद्ध आहे. जगभरातील कोल्टनच्या एकूण उत्पादनापैकी 15 टक्के उत्पादन याच भागातून होते. हे खनिज स्मार्टफोन आणि लॅपटॉप सारख्या प्रगत इलेक्ट्रॉनिक्स उपकरणांसाठी अत्यंत महत्त्वाचे मानले जाते, मात्र तिथे काम करणाऱ्या मजुरांची सुरक्षा नेहमीच वाऱ्यावर असते.

या भीषण दुर्घटनेनंतर विद्रोही गटाने नियुक्त केलेल्या प्रशासनाने या भागातील खाणकामावर तात्पुरती बंदी घातली असून, खाणींच्या जवळ असलेल्या झोपडपट्ट्यांमधील रहिवाशांना सुरक्षित स्थळी स्थलांतरित होण्याचे आदेश दिले आहेत. पूर्व कांगोमध्ये गेल्या अनेक दशकांपासून हिंसाचार आणि अस्थिरतेचे वातावरण आहे.

सरकारी सैन्य आणि विद्रोही गटांमधील संघर्षामुळे या खनिजसमृद्ध भागातील मजुरांना अत्यंत धोकादायक परिस्थितीत काम करावे लागते. पावसाळ्यात भूस्खलन (Landslide) होणे ही इथे मोठी समस्या आहे, मात्र गरिबीमुळे हजारो मजूर आपल्या जीवाची पर्वा न करता केवळ काही डॉलर्ससाठी या मृत्यूच्या सापळ्यात काम करत असतात. या ताज्या दुर्घटनेने तेथील भीषण मानवी संकटाचे वास्तव पुन्हा एकदा जगासमोर आणले आहे.