Afghan Refugees Truck Accident: अफगाणिस्तानातून एक अत्यंत धक्कादायक बातमी समोर आली. पाकिस्तानमधून जबरदस्तीने हाकलून लावल्यानंतर आपल्या मूळ गावी परतणाऱ्या अफगाण निर्वासितांच्या एका ट्रकचा भीषण अपघात झाला. हा भरधाव ट्रक महामार्गावर उलटल्याने तब्बल 18 निर्वासितांचा जागीच दुर्दैवी मृत्यू झाला, तर 35 हून अधिक जण गंभीर जखमी झाले. अपघातानंतर घटनास्थळी टाहो फुटला.

स्थानिक नागरिक आणि प्रशासनाने तातडीने धाव घेत जखमींना जवळच्या रुग्णालयात दाखल केले असून त्यांच्यावर उपचार सुरु आहेत. पाकिस्तान सरकारने बेकायदेशीर निर्वासितांवर सुरु केलेल्या कठोर कारवाईनंतर हे सर्वजण अत्यंत हलाखीच्या परिस्थितीत अफगाणिस्तानात परतत होते, मात्र मायभूमीत पाऊल ठेवण्यापूर्वीच त्यांच्यावर काळाने झडप घातली.

मिळालेल्या अधिकृत माहितीनुसार, हा भीषण अपघात पूर्व अफगाणिस्तानमधील एका मुख्य महामार्गावर शनिवारी घडला. लघमान प्रांतातील काबुल आणि नंगरहार प्रांताला जोडणाऱ्या हायवेवर निर्वासितांनी खचाखच भरलेला एक ट्रक चालकाचे नियंत्रण सुटल्याने पलटी झाला. हा अपघात (Accident) इतका भीषण होता की ट्रकमधील अनेक जण खाली चिरडले गेले. मृतांमध्ये सर्वाधिक संख्या निष्पाप मुले आणि महिलांची आहे.

प्रांतीय राज्यपालांचे प्रवक्ते अब्दुल मलिक नियाजई यांनी दिलेल्या माहितीनुसार, मृतांमध्ये 10 लहान मुले आणि 5 महिलांचा समावेश आहे. अपघातातील सर्व जखमींना उपचारासाठी नंगरहार प्रांतातील विविध रुग्णालयांमध्ये हलवण्यात आले असून, काहींची प्रकृती अद्यापही चिंताजनक आहे. तालिबान सरकारचे मुख्य प्रवक्ते झबिहुल्लाह मुजाहिद यांनी या घटनेबद्दल तीव्र दुःख व्यक्त केले असून पीडित कुटुंबांप्रती आपल्या संवेदना व्यक्त केल्या.

हे सर्व प्रवासी त्या हजारो अफगाण नागरिकांपैकी होते, ज्यांना नुकतेच पाकिस्तान सोडण्यास भाग पाडले गेले होते. पाकिस्तान सरकारने 2023 मध्ये देशातील बेकायदा स्थलांतरितांविरुद्ध मोठी मोहीम उघडली. तेव्हापासून लाखो अफगाणी नागरिकांना एकतर पाकिस्तानातून हाकलून देण्यात आले किंवा त्यांना देश सोडण्यास मजबूर केले गेले. याच काळात इराणनेही अफगाण निर्वासितांची हकालपट्टी करण्याची प्रक्रिया वेगवान केली. यामुळे गेल्या काही महिन्यांत लाखो अफगाण नागरिक दोन्ही देशांतून आपल्या मायदेशी परतत आहेत.

विशेष म्हणजे, यामध्ये अशा अनेक लोकांचा समावेश आहे ज्यांचा जन्म पाकिस्तानात झाला होता आणि ज्यांनी तिथे अनेक दशके राहून कष्ट केले होते. सर्वकाही गमावून मायदेशी परतणाऱ्या या असहाय्य लोकांच्या झालेल्या अपघातामुळे संपूर्ण परिसरात आणि निर्वासितांच्या छावण्यांमध्ये शोककळा पसरली.