दिल्लीचे उपमुख्यमंत्री मनीष सिसोदिया (Manish Sisodia) यांच्या कार्यालयावर सीबीआयकडून छापा टाकण्यात आला आहे. मनीष सिसोदिया यांनी दुपारी चार वाजता ट्विट करून याबाबत माहिती दिली.

दरम्यान, 12 जानेवारीला दिल्लीचे मुख्यमंत्री अरविंद केजरीवाल (Arvind Kejriwal) यांना 164 कोटी रुपयांच्या वसुलीची नोटीस देण्यात आली आहे. दिल्ली सरकारच्या डीआयपी (Delhi Govt. DIP) सचिवांनी ही वसुली नोटीस पाठवली आहे. तसेच 10 दिवसांच्या आत रुपये जमा करण्यास सांगितले आहे.

सिसोदिया यांनी ट्विटद्वारे छापेमारीबद्दल माहिती दिली आहे. "आज पुन्हा सीबीआय माझ्या कार्यालयात पोहोचली आहे, त्यांचे स्वागत आहे. त्यांनी माझ्या घरावर आणि ऑफिसवर छापे टाकले, काहीही मिळाले नाही. माझ्या गावी जाऊन लॉकरमध्ये शोध घेतला पण काहीही सापडले नाही आणि सापडणार नाही." असे ट्विट सिसोदिया यांनी केले आहे.

दरम्यान, अशा प्रकारचे छापे टाकले जात नसल्याचे सीबीआयशी संबंधित सूत्रांचे म्हणणे आहे. उत्पादन शुल्क प्रकरणाशी संबंधित काही कागदपत्रे गोळा करण्यासाठी हे पथक सचिवालयात गेले होते आणि नंतर तेथून निघून गेले. असे त्यांनी म्हटले आहे.

दिल्लीचे उपमुख्यमंत्री मनीष सिसोदिया यांच्या दिल्ली सचिवालयातील कार्यालयावर सीबीआयचा छापा सुरू आहे. गेल्या वर्षी ऑगस्ट महिन्यात कथित दारू घोटाळ्याप्रकरणी सीबीआयने गाझियाबादमधील पंजाब नॅशनल बँकेच्या लॉकरची झडती घेतली होती.