देशात इलेक्ट्रिक वाहनांची संख्या झपाट्याने वाढत आहे. टाटाच्या इलेक्ट्रिक सेगमेंटच्या अनेक गाड्या बाजारात धुमाकूळ घालत आहेत. पण, टाटा टियागो इलेक्ट्रिक कारबद्दल (Tata Tiago EV) लोकांमध्ये प्रचंड उत्साह आहे. वास्तविक, ही देशातील सर्वात स्वस्त इलेक्ट्रिक कार असू शकते, असे बोलले जात आहे. सप्टेंबर महिन्यातच ही कार लॉन्च करण्याची तयारी सुरू आहे. त्याचवेळी Mahindra XUV 400 इलेक्ट्रिक देखील या महिन्यात लॉन्च केले जाऊ शकते.

इलेक्ट्रिक कार मार्केट काबीज करण्यासाठी टाटा मोटर्स वेगाने आपल्या इलेक्ट्रिक कार लॉन्च करत आहे. आतापर्यंत टाटाच्या दोन इलेक्ट्रिक कार, टाटा नेक्सॉन इलेक्ट्रिक कार आणि टाटा टिगोर इलेक्ट्रिक कार बाजारात आल्या आहेत. दोन्ही गाड्यांना उत्स्फूर्त प्रतिसाद मिळाला आहे. आता टाटा मोटर्स आपले तिसरे मॉडेल टाटा टियागो इलेक्ट्रिक कार सेगमेंटमध्ये लॉन्च करणार आहे.

टाटा मोटर्सची इलेक्ट्रिक कार Tata Tiago याच महिन्यात सप्टेंबरमध्ये लॉन्च होऊ शकते. असा दावा केला जात आहे की टाटा टियागो इलेक्ट्रिक कार सप्टेंबर 2022 च्या शेवटच्या आठवड्यात बाजारात लॉन्च केली जाऊ शकते. इलेक्ट्रिक कार सेगमेंटमध्ये टाटा टियागो ही सर्वात स्वस्त इलेक्ट्रिक कार असेल असे बोलले जात आहे.

टाटा टिगोर इलेक्ट्रिकची किंमत 12.5 लाख रुपये आहे. याशिवाय टाटाच्या नेक्सॉन इलेक्ट्रिक कारची किंमत 14.99 लाख रुपये आहे. टाटाची पुढची इलेक्ट्रिक कार टाटा टियागो यापैकी सर्वात स्वस्त असण्याची शक्यता आहे.