Telangana School Principal Murder Case: तेलंगणातील नलगोंडा जिल्ह्यातील कोंडामल्लेपल्ली येथे शाळेच्या प्राचार्या कल्लू रुपा रेड्डी यांच्या हत्येचा तपास पोलिसांनी उघड केला. या प्रकरणात दहावीतील दोन अल्पवयीन विद्यार्थ्यांना अटक करण्यात आली. पोलिसांच्या माहितीनुसार, पैशांची गरज आणि महागड्या वस्तूंची हौस पूर्ण करण्यासाठी दोन्ही विद्यार्थ्यांनी प्राचार्यांच्या घरात चोरी करण्याचा कट रचला. मात्र, त्यांनी ओळखल्यानंतर प्राचार्यांची निर्घृण हत्या केल्याचा आरोप आहे.
रुपा रेड्डी यांच्या हत्येपूर्वी त्यांनी आपल्या मावशीशी फोनवर संवाद साधला होता. या संभाषणातील शेवटचा ऐकू आलेला शब्द ‘बाबू’ होता. त्यानंतर त्यांचा फोन बंद झाला. तपास करताना पोलिसांच्या लक्षात आले की, संबंधित शाळेत विद्यार्थ्यांना संबोधताना ‘बाबू’ हा शब्द वापरला जात असे. त्यामुळे तपासाची दिशा शाळेतील विद्यार्थ्यांकडे वळली.
पोलिसांनी (Police) सुरुवातीला 13 विद्यार्थ्यांची माहिती गोळा केली. त्यापैकी पाच जणांची चौकशी करण्यात आली. त्यानंतर दोन दहावीच्या विद्यार्थ्यांवर पोलिसांचा संशय बळावला. दोघेही अचानक मोठ्या प्रमाणात पैसे खर्च करत असल्याचे तपासात आढळून आले.
तपासादरम्यान पोलिसांनी परिसरातील CCTV फुटेज तपासले. डोनियाला X-रोड परिसरात दुचाकीवरुन जात असलेल्या दोन विद्यार्थ्यांना ताब्यात घेऊन चौकशी करण्यात आली. त्यांच्याकडून 1.54 लाख रुपये रोख सापडल्याचे पोलिसांनी सांगितले. यातील काही नोटांवर रक्ताचे डाग असल्याचेही तपासात समोर आले. चौकशीत दोन्ही विद्यार्थ्यांनी प्राचार्यांच्या हत्येची आणि त्यांच्याकडील पैसे चोरी केल्याची कबुली दिल्याचा दावा पोलिसांनी केला.
पोलिसांच्या तपासानुसार, दोन्ही विद्यार्थी एकाच हॉस्टेलच्या खोलीत राहत होते. त्यांना महागडे फोन, बाईक आणि मौजमजा करण्याची आवड होती. सोशल मीडिया आणि YouTubeच्या माध्यमातून सहज पैसे कमावण्याचे मार्ग ते शोधत होते, अशी माहिती तपासात समोर आली. हॉस्टेलमध्ये त्यांच्या बॅगेत फोन आणि काही पैसे आढळल्यानंतर प्राचार्यांनी वर्गात त्यांना फटकारले होते. तसेच त्यांच्या वर्तनाबाबत पालकांना माहिती देण्याचा इशाराही दिला होता. यामुळे दोन्ही विद्यार्थ्यांच्या मनात प्राचार्यांविषयी नाराजी निर्माण झाल्याचे पोलिसांनी म्हटले.
पोलिसांच्या माहितीनुसार, दोन्ही विद्यार्थ्यांनी कथित हत्येपूर्वी सुमारे आठवडाभर प्राचार्यांच्या घराची पाहणी केली होती. घटनेच्या दिवशी त्यांनी कपडे बदलले आणि चाकू व हातमोजे खरेदी केले. घराच्या समोरील CCTV कॅमेऱ्यापासून वाचण्यासाठी त्यांनी मागच्या बाजूने घरात प्रवेश केला. घरात प्रवेश केल्यानंतर त्यांनी पैसे शोधले. मात्र, प्राचार्यांनी दोघांना ओळखल्याने परिस्थिती गंभीर बनली.
पोलिसांच्या म्हणण्यानुसार, ओळख पटण्याची भीती असल्याने दोन्ही विद्यार्थ्यांनी रुपा रेड्डी यांच्यावर चाकूने सुमारे 27 वार केले. त्यानंतर घरातील रोकड आणि त्यांचा फोन घेऊन ते मागील मार्गाने घटनास्थळावरुन पसार झाले. या हत्येचा तपास करण्यासाठी पोलिसांनी विशेष पथके तयार केली होती. फॉरेन्सिक पुरावे, बोटांचे ठसे, श्वानपथक, CCTV फुटेज आणि तांत्रिक तपासाच्या आधारे पोलिसांनी आरोपींपर्यंत पोहोचल्याचे सांगितले.
तपासादरम्यान सुमारे 30 किलोमीटरच्या परिसरातील 70 पेक्षा जास्त CCTV कॅमेऱ्यांचे फुटेज तपासण्यात आले. याशिवाय 80 हून अधिक संशयितांची चौकशी करण्यात आली. विविध तांत्रिक पुरावे आणि घटनास्थळी मिळालेल्या फॉरेन्सिक माहितीच्या आधारे तपास पुढे नेण्यात आला. पोलिसांनी आरोपींकडून रोकड, मृत महिलेचा फोन, सुमारे 60 हजार रुपयांना खरेदी केल्याचे सांगितलेला iPhone, हत्येसाठी वापरल्याचा चाकू, हातमोजे, मास्क आणि दोन मोबाईल फोन जप्त केल्याचे सांगितले.
या संपूर्ण प्रकरणात प्राचार्यांच्या शेवटच्या संभाषणातील ‘बाबू’ हा एक शब्द, CCTV फुटेज आणि संशयितांकडे सापडलेला iPhone यांसारखे धागे तपासासाठी महत्त्वाचे ठरले. पोलिसांच्या तपासामुळे अखेर या हत्येचा उलगडा झाल्याचे सांगण्यात आले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.