Cyber Crime: APK File डाउनलोड करणं पडलं महागात! आके येथील महिलेच्या बँक खात्यातून 6.5 लाख उकळले, अज्ञाताविरुद्ध गुन्हा दाखल

मडगाव: एपीके मालवेअर फाईल डाउनलोड करण्यास प्रवृत्त करून आके येथील एका ६३ वर्षीय महिलेच्या बँक खात्यातून तब्बल ६ लाख ५१ हजार १०५ रुपये परस्पर काढून घेण्यात आले.

या प्रकरणी मडगाव पोलिसांनी अज्ञाताविरुद्ध भारतीय न्याय संहितेच्या कलम ३१८ (४) अंतर्गत गुन्हा दाखल केला आहे. पोलीस निरीक्षक अरुण गावस देसाई यांच्या मार्गदर्शनाखाली उपनिरीक्षक स्वदेश देसाई पुढील तपास करीत आहेत.

नंदिनी गायतोंडे या तक्रारदार आहेत. पोलिसांनी दिलेल्या माहितीनुसार, अज्ञात इसमाने त्यांना एपीके फाइल डाउनलोड करण्यास प्रवृत्त केले. त्यानंतर त्यांच्या मोबाईलवर बँक खात्याशी जोडलेल्या क्रमांकावर अनेक ओटीपी संदेश आले.

हे संदेश त्यांनी दुर्लक्षित केले. मात्र, त्यानंतर खात्यातून पाच अनधिकृत व्यवहार झाल्याचे त्यांच्या निदर्शनास आले. एकूण ६ लाख ५१ हजार १०५ रुपयांचे व्यवहार केल्याचे तक्रारीत नमूद केले आहे.