काणकोण: वेळ : दुपारी बाराची. स्‍थळ : मल्लिकार्जुन विद्यालयाचे आवार. डोक्‍यावर रणरणते ऊन. त्‍यामध्‍ये किमान दोन हजार लोक डोळ्यांत चैतन्‍य एकवटून, मनी कुतूहल बाळगून एकमेव उघड्या गेटकडे टक लावून पाहात होते. पंधरा मिनिटांनी ‘तो’ क्षण आलाच. गेटसमोर जीए ०९ ए : १३१३ क्रमांकाची ‘बीएमडब्‍ल्‍यू’ उभी राहिली आणि क्रिकेटचा देव अवतरला... आबालवृद्धांच्या आनंदाला पारावार नव्‍हता, सारे कमालीचे सुखावले.

‘अजि म्‍या सचिन तेंडुलकर पाहिला’ अशी भावना ओसंडून वाहत होती. औचित्‍य होते, क्रीडा आंगण बहुद्देशीय प्रकल्‍पाच्या उद्‍घाटनाचे! पदाधिकारी सचिनला घेऊन शाळा कार्यालयात घेऊन आले. भारतरत्‍न सचिनच्‍या आगमनाने वातावरण अधिकच प्रासादिक बनले. आदरातिथ्‍यासाठी तेलविरहित खाद्यपदार्थ आयोजकांनी समोर मांडले होते. त्यामध्ये पातोळ्या, उकडीचे मोदक, द्रोण व घरगुती भाजलेल्या काजू बियांचा समावेश होता. गोवन पाहुणचाराने सचिन भारावला. तेथून थेट मोर्चा वळला व्‍यासपीठाकडे. टाळ्यांच्‍या गजरात उद्‍घाटनाचा सोहळा झाला आणि सचिनने हलक्‍या आवाजात संबोधन सुरू केले. ‘उत्तुंग स्‍वप्‍ने पाहा, ती साकारण्‍यासाठी कठोर परिश्रम करा’ अशी त्‍याची साद अनेकांना भारावून गेली. अध्यक्ष शांबा देसाई यांच्या हस्ते सचिनला लाकडाची अंबारी भेट देण्यात आली. चाररस्ता येथील सेंत्रो प्रोमोतर द इस्त्रूसांव संस्थेच्या श्री मल्लिकार्जुन विद्यालय व संलग्न शैक्षणिक शाखांच्या कला-क्रीडा बहुउद्देशीय सभागृहाचे उद्‍घाटन यादगार ठरले.