पणजी: गोवा राज्य पर्यावरण परिणाम मूल्यांकन प्राधिकरणाने ‘वर्ल्डवाइड रिसॉर्ट्‌स अँड एंटरटेन्मेंट प्रा. लि.’ या कंपनीच्या बांबोळी येथील बांधकाम प्रकल्पाचे काम त्वरित थांबविण्याचे आदेश जारी केले आहेत. ही कारवाई पर्यावरण (संरक्षण) कायदा, १९८६ च्या कलम ५ अंतर्गत करण्यात आली आहे. आमदार वीरेश बोरकर यांनी या बांधकामात पर्यावरणविषयक नियमांची पायमल्ली होत असल्याचा आरोप करत संबंधित प्राधिकरणाकडे दिलेल्या तक्रारीनंतर कारवाई केली आहे.

प्राधिकरणाने जारी केलेल्या नोटीसीत स्पष्ट केले आहे की, बांबोळी गावातील तिसवाडी तालुक्यातील क्षेत्रात पर्यावरण मंजुरी न घेता अनधिकृतपणे बांधकाम सुरू असल्याचे निदर्शनास आले आहे. या प्रकल्पासाठी पर्यावरण मंजुरीचा अर्ज अद्याप विचाराधीन असल्याची माहितीही प्राधिकरणाने दिली आहे.