पणजी: गोवा राज्य प्रदूषण नियंत्रण मंडळाचे अध्यक्ष म्हणून डॉ. लेविन्‍सन मार्टिन्स हे आयएएस अधिकारी सोमवारी पदभार स्वीकारणार आहेत. राज्य सरकारने त्यांची त्या पदावर नियुक्ती केली आहे.

ते या पदावर किमान तीन वर्षे राहतील. राज्य सरकारच्या सेवेत असताना त्यांनी या पदासाठी मंडळाने जारी केलेल्या जाहिरातीस अनुसरून अर्ज केला होता. त्यांची निवड होण्यापूर्वी केंद्रीय गृह मंत्रालयाने त्यांना आपल्या सेवेत घेत भारतीय प्रशासकीय सेवेच्या २०१७च्या तुकडीचे अधिकारी म्हणून निवड केली. त्यामुळे मंडळाच्या अध्यक्षपदावरील नियुक्तीस केंद्रीय गृह मंत्रालयाची पूर्व परवानगी आवश्यक बनली होती. ती मिळाल्यावर आज राज्‍य सरकारने नियुक्तीचा आदेश जारी केला.

मंडळाच्या सदस्य सचिवपदावर गोवा क्रीडा प्राधिकरणाच्या कार्यकारी संचालक डॉ. गीता नागवेकर यांची नियुक्ती होणार आहे. त्यांच्या नियुक्तीस अद्याप सरकारने मान्यता दिलेली नाही. त्याशिवाय मंडळाचे अन्य सदस्य नियुक्त करावे लागणार आहेत. त्यानंतरच मंडळ पूर्ण क्षमतेने काम करू शकणार आहे.