अव्वल भारतीय जलतरणपटू साजन प्रकाशने डेन्मार्कमधील कोपनहेगन येथे झालेल्या डॅनिश ओपन स्विमिंग चॅम्पियनशिपमध्ये पुरुषांच्या 200 मीटर बटरफ्लाय स्पर्धेत सुवर्णपदक जिंकून हंगामाची सुरुवात केली. या वर्षीच्या आपल्या पहिल्या आंतरराष्ट्रीय स्पर्धेत भाग घेत असलेल्या प्रकाशने शुक्रवारी रात्री 1.59.27 सेकंदांची वेळ नोंदवली.

तत्पूर्वी, केरळच्या जलतरणपटूने हीटमध्ये 2.03.67 सेकंदांची वेळ नोंदवून 'अ' फायनलसाठी पात्रता मिळवली होती. दोन वेळचा ऑलिम्पियन प्रकाश म्हणाला, "या महिन्यात आमच्याकडे काही स्पर्धा आहेत. राष्ट्रकुल खेळ (Commonwealth Games) आणि आशियाई खेळांसाठी आम्ही हळूहळू शीर्षस्थानी येण्याचा प्रयत्न करू."

आर माधवनच्या मुलाने चमत्कार केला

वेदांत माधवननेही स्पर्धेत सकारात्मक सुरुवात केली, त्याने वैयक्तिक सर्वोत्तम कामगिरी केली आणि पुरुषांच्या 1500 मीटर फ्रीस्टाइल स्पर्धेत रौप्य पदक जिंकले. भारतीय अभिनेता आर माधवनचा मुलगा वेदांतने 10 जलतरणपटूंच्या (Swimmers) अंतिम फेरीत 15.57.86 सेकंद वेळेसह दुसरे स्थान पटकावले. आपल्या मुलाच्या या यशाबद्दल आर माधवनने आनंद व्यक्त केला आहे.

मार्च 2021 मध्ये झालेल्या लॅटव्हिया ओपनमध्ये सोळा वर्षांच्या मुलाने कांस्यपदक जिंकले होते. त्याने गेल्या वर्षी ज्युनियर राष्ट्रीय जलतरण स्पर्धेत सात पदके (चार रौप्य आणि तीन कांस्य) जिंकून छाप पाडली. महिलांच्या 400 मीटर मेडलेच्या बी फायनलमध्ये शक्ती बालकृष्णनने दुसरे आणि एकूण आठवे स्थान पटकावले.