Sharad Pawar: राष्ट्रवादी काँग्रेसचे (NCP) अध्यक्ष शरद पवार (Sharad Pawar) शनिवारी पक्षाच्या बैठकीत सहभागी होण्यासाठी शिर्डीत पोहचले. तथापि, गेले काही दिवस पवारांवर मुंबईतील एका रूग्णालयात उपचार सुरू होते. पण कार्यकर्त्यांच्या आग्रहास्तव पवारांनी रूग्णालयातून थेट शिर्डी गाठली.

शरद पवारांना गेल्या काही दिवसांपासून ताप आहे. त्यामुळे मुंबईतील ब्रीच कँडी रूग्णालयात त्यांच्यावर उपचार सुरू आहेत. दरम्यान, शुक्रवारी शरद पवार हे शिर्डीत सुरू असलेल्या पक्षाच्या बैठकीत मुंबईतील रूग्णालयातून व्हिडिओ कॉन्फरन्सिंगद्वारे सहभागी झाले होते. शनिवारी दुपारी मात्र तिथूनचे ते पक्षाच्या बैठकीत प्रत्यक्ष उपस्थित राहण्यासाठी अहमदनगर जिल्ह्यातील शिर्डीला आले.

मुंबईतील महालक्ष्मी रेसकोर्सवरून एका हेलिकॉप्टरद्वारे पवारांनी शिर्डी गाठली. यावेळी त्यांच्यासमवेत डॉक्टरांचे एक पथकही होते. शिर्डीतील कार्यक्रमानंतर ते पुन्हा हेलिकॉप्टरद्वारे मुंबईत परतले आणि रूग्णालयात दाखल झाले. डॉक्टरांनी पवारांना पुढील 10 ते 15 दिवस विश्रांतीचा सल्ला दिला आहे.

पक्षाचे कार्यकर्तेच संघटना बळकट करत असतात आणि कार्यकर्तेच राजकीय बदल घडवतील, असा विश्वास शिर्डीतील बैठकीत केलेल्या भाषणात पवारांनी व्यक्त केला. आजारी असल्याने या बैठकीत पवारांना जास्त वेळ बोलता आले नाही. त्यामुळे माजी गृहमंत्री दिलीप वळसे-पाटील यांनी शरद पवारांचे उर्वरीत भाषण वाचून दाखवले.

शरद पवार सध्या 81 वर्षांचे आहेत. ते म्हणाले की, पक्षातील कार्यकर्त्यांची इच्छा होती, मी बैठकीला यावे. या बैठकीत पक्षाची विचारसरणी, पुढील काळातील कार्यक्रम, धोरणांवर चर्चा होणार होती.