गोव्याचे मुख्यमंत्री डॉ. प्रमोद सावंत सध्या महाराष्ट्र दौऱ्यावर आहेत. महाराष्ट्रात विधानसभा निवडणुकीची रणधुमाळी पाहायला मिळत आहे. याच पार्श्वभूमीवर मुख्यमंत्री सावंत सपत्नीक अक्कलकोटला पोहोचले. यावेळी त्यांच्याबरोबर महायुतीचे उमेदवार सचिन कल्याणशेट्टी देखील आहेत. मुख्यमंत्र्यांनी सपत्नीक स्वामी समर्थांचे दर्शन घेतले. मुख्यमंत्र्यांनी स्वामी समर्थांच्या चरणी जनतेचे कल्याण, सुख, समृद्धी आणि शांतीसाठी प्रार्थना केली. आता यापुढे विधानसभा निवडणुकीनिमित्त मुख्यमंत्री सावंत महाराष्ट्रात प्रचारसभा घेतानाही दिसणार आहेत. खासकरुन कोकण पट्ट्यात मुख्यमंत्री सावंत महायुतीच्या उमेदवारांचा प्रचार करताना दिसतील.

स्टार प्रचारक

दरम्यान, विधानभा निवडणुकीच्या पार्श्वभूमीवर महायुती आणि महाविकास आघाडीमधील पक्ष आपआपल्या उमेदवारांच्या याद्या जाहीर करत आहेत. दोनच दिवसांपूर्वी, भाजपकडून 40 स्टार प्रचारकांची यादी जाहीर करण्यात आली. या 40 स्टार प्रचारकांमध्ये गोव्याचे माजी मुख्यमंत्री डॉ. प्रमोद सावंत यांचेही नाव होते.

दिवाळीनंतर पंतप्रधान मोदींच्या महाराष्ट्रात सभा

पंतप्रधान मोदी दिवाळीनंतर महाराष्ट्रात भव्य सभा घेण्याची तयारी करत आहेत. 5 ते 14 नोव्हेंबर दरम्यान पीएम मोदी महायुतीसाठी मते मागणार आहेत. पंतप्रधान नरेंद्र मोदी सुमारे 8 दिवस महाराष्ट्रात अनेक निवडणूक सभा घेणार आहेत. पंतप्रधान मोदी केवळ भाजपचाच (BJP) नव्हे तर महायुतीच्या उमेदवारांचाही प्रचार करणार आहेत.

मुख्यमंत्र्यांना उतरवलं निवडणुकीच्या मैदानात

भाजपच्या स्टार प्रचारकांमध्ये उत्तर प्रदेशचे मुख्यमंत्री योगी आदित्यनाथ, गोव्याचे मुख्यमंत्री प्रमोद सावंत, गुजरातचे मुख्यमंत्री भूपेंद्र पटेल, छत्तीसगडचे मुख्यमंत्री विष्णू देव साई, मध्य प्रदेशचे मुख्यमंत्री मोहन यादव, राजस्थानचे मुख्यमंत्री भजनलाल शर्मा, हरियाणाचे मुख्यमंत्री नायब सिंह सैनी, आसामचे मुख्यमंत्री हिमंता बिस्वा सरमा यांचा समावेश आहे.