5000 Extra Buses To Konkan For Festival Travelers

मुंबई: कोकणातल्या चाकरमान्यांसाठी मोठी दिलासादायक बातमी आहे. यंदाच्या गणेशोत्सवात कोकणात जाणाऱ्या भाविकांसाठी महाराष्ट्र राज्य मार्ग परिवहन महामंडळाने तब्बल ५००० जादा बसेस सोडण्याचा निर्णय घेतला आहे. या बसेस २३ ऑगस्ट ते ७ सप्टेंबर २०२५ या कालावधीत कोकणात धावणार आहेत, अशी माहिती परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिली.

मंत्रालयात पार पडलेल्या गणपती उत्सवाच्या वाहतूक नियोजन बैठकीनंतर सरनाईक म्हणाले, "गणपती बाप्पा, कोकणचा चाकरमानी आणि एसटी यांचं अतूट नातं आहे. कोकणातल्या चाकरमान्यांसाठी हा सण विशेष आहे, त्यामुळे नफ्या-तोट्याचा विचार न करता एसटी दरवर्षी गणेशोत्सवासाठी जादा बसेस चालवते. यंदाही आम्ही ५००० अतिरिक्त गाड्या कोकणात पाठवत आहोत."

या बैठकीला एसटीचे उपाध्यक्ष व व्यवस्थापकीय संचालक डॉ. माधव कुसेकर तसेच इतर वरिष्ठ अधिकारी उपस्थित होते.

महाराष्ट्र राज्य मार्ग परिवहन महामंडळाने (एसटी) नुकत्याच पार पडलेल्या आषाढी एकादशी यात्रेसाठी तब्बल ५२०० जादा बसेस सोडल्या होत्या. या विशेष बस सेवेला राज्यभरातील भाविकांकडून अभूतपूर्व प्रतिसाद मिळाला. लाखो वारकऱ्यांनी या सेवेचा लाभ घेत पंढरपूरच्या वारीत सहभाग घेतला.

या यशस्वी व्यवस्थापनाच्या अनुभवातून एसटीने आता आगामी गणेशोत्सवासाठीही ५००० जादा बसेस उपलब्ध करून देण्याचा निर्णय घेतला आहे.

यंदाच्या गणपती उत्सवाच्या पार्श्वभूमीवर कोकणात चाकरमान्यांच्या मोठ्या ओघाची अपेक्षा आहे. त्यामुळे महाराष्ट्र राज्य मार्ग परिवहन महामंडळाने (एसटी) प्रवाशांच्या सोयीसाठी तब्बल ५००० जादा गाड्या कोकणातील विविध मार्गांवर चालवण्याचा निर्णय घेतला आहे.

प्रवाशांना npublic.msrtcors.com या अधिकृत संकेतस्थळावर जाऊन तिकिट आरक्षित करता येणार आहे. याशिवाय, एसटी महामंडळाच्या बस स्थानकांवर थेट तिकिट खरेदी करता येणार असून, MSRTC Bus Reservation अॅप द्वारेही हे आरक्षण सहज शक्य आहे.